Kayamukat sa usa lang ka lagda
Tan-awa ra gud ang kayamukat sa Malakanyang:
• Napupos ang memorandum ni Executive Secretary Salvador Medialdea pagpasimang sa tanang incoming international flights sa Mactan Cebu International Airport (MCIA) ngadto sa Ninoy Aquino International Airport (NAIA) niadtong tungang gabii sa Sabado, Hunyo 5, 2021;
• Way ek silang Medialdea ug presidential spokesman Harry Roque sa tibuok weekend sa rekomendasyon sa Department of Health (DOH) niadtong Huwebes, Hunyo 3, nga ang lagda sa Inter-Agency Task Force (IATF) ug di ang ordinansa sa Cebu Provincial Board (PB) maoy ipatuman sa swabbing ug isolation sa mga pasahero.
* * *
• Samtang nagpabilin nga tak-om ang Malakanyang, nibalik og tugpa ang international flights sa MCIA --apil na ang gikan sa Doha, Qatar, ug sa Singapore-- niadtong Domingo, Hunyo 6, ug ang mga lagda sa PB, di sa IATF, mao ang gipatuman;
• Bugtong kisaw sa kontrobersiya gikan sa Malakanyang mao ang pasidaan sa DOH niadtong Lunes, Hunyo 7, nga ang swab tests ra nga gisugo sa IATF sa ikapitong adlaw human sa pag-abot sa Overseas Filipino Workers (OFWs) ug returning overseas Filipinos (ROFs) ang bayran sa Philippine Health Insurance Corp. (PhilHealth);
* * *
• Pagka gabii niadtong Lunes, Hunyo 7, nakugang ang lokal nga travel agencies dihang gipahibawo sila sa mga kompaniya sa ayroplano nga ang mga pasahero sa incoming international flights adto na sab tugpa sa NAIA imbes sa MCIA sugod gahapon, Hunyo 8;
• Pagka buntag sa Martes nakadawat ang travel agencies sa “advance copy” sa memorandum ni Medialdea nga naglugway sa pagpasimang sa international flights sa MCIA ngadto sa NAIA hangtod sa Hunyo 12;
* * *
• Pagka udto sa Martes, Hunyo 8, gipahibawo ni Roque ang memorandum ni Medialdea nga igo lang niingon nga padayon pa nga gituki unsaon ang hapsay nga pagpatuman sa mga lagda sa IATF, di sa PB, sa MCIA; ug
• Way nagtagad sa pagpasabot nganong Hunyo 8 na gipahibawo ang memorandum nga gipetsahan og Hunyo 5, nganong wa dayon mapatuman ug nganong haskang dugaya nga nahusay ang panagsungi sa IATF ug sa Kapitolyo sa Sugbo, nga niresulta sa pagkasaag, dugang kahasol ug dugang gasto sa OFWs ug ROFs ug sa kaapiki sa gatosan ka panginabuhi ug negosyo sa sud ug sa palibot sa MCIA.
- Latest
