Pagtaliwan sa lunsay’ng pangalagad
Sa mga sakop sa ilang pamilya nga nasud sa politika, si Sylvan “Jack” Jakosalem, nga namatay gahapon sa buntag human sa napu ka tuig nga pag-antos sa iyang sakit, ang labing madasigong politiko. Apan sama sa iyang mga paryente, wa siya manghagad pagsud:
• Iyang apohan, Dionisio Jakosalem, gidapit ni Sergio Osmena Sr. pagdagan pagka gobernador sa Sugbo ug maoy nagduma sa Kapitolyo sa 1906-1912;
• Iyang amahan, Silvano Jakosalem, gitudlo pagka mayor sa Dumanjug sa 1943-1944; ug
• Iyang ig-agaw, Ferdinand Jakosalem, gitudlo pagka provincial board member sa Sugbo sa 1986-1987.
* * *
Lahi sa ilang mga apohan nga nagkauban sa Colegio-Seminario de San Carlos (karon University of San Carlos), si Jack di suod ni Tommy Osmena. Si anhing Cerge Remonde, pangu sa Kapisanan ng mga Brodkaster ng Pilipinas (KBP), maoy nirekomendar sa batan-ong magsisibya dihang nangita si Tommy og kandidato pagkakonsehal sa Dakbayan sa Sugbo nga suod sa media sa piniliay sa 2001.
Natiwas ni Jack ang tulo ka sunudsunod niyang termino hangtod sa 2010. Lahi sa mga nabag-ohan sa politika, si Jack hingpit dayon nga nigakos sa iyang bag-ong kinabuhi.
* * *
Masakiton na si Jack dihang nidagan pagbalik pagkakonsehal niadtong 2013. Nagplano untang iyang partido nga pulihan sa iyang asawang si Sharon. Apan di kadagan kay gitangtang sa listahan sa mga botante human napakyas pagbotar sa 2010.
Gihangyo nilang ig-agaw ni Jack nga si Ferdinand apan nibalibad. Nagdumili pagtubag sa ilang tawag ang akong asawa, usa sa labing suod ni Jack, nga nahibaw-an nilang rehistrado pang botante sa Mabolo. Maong gipabilin si Jack sa balota bisan wa nang kakampanya.
* * *
Ang talagsaong kakugihan ni Jack, sa himsog pa, pagsanong sa tanang pagdapit sa mga hikay sa iyang mga dumadapig sa mga barangay maoy gidudahan sa mga doktor nga hinungdan sa iyang neurocysticercosis nga gikan sa karneng wa maluto. Namatay si Jack nga wa matino unsay tinuod nga nakapaluya niya.
Nagbangotan sa iyang kamatayon si Sharon, ilang mga anak nga silang Basti ug Santino, kabanay, kahigalaan ug mga Sugbuanon kansang kinabuhi iyang nahikap. Nitaliwan ang politiko nga usa sa pipila lang nga nipasundayag og lunsay nga kahinangop sa kahigayonan sa pag-alagad, nga maoy batakang mithi sa politika.
- Latest
