Kalainan sa Oslob ug Lila
Sa makausa pa, napamatud-an sa mga Bol-anon ang ilang katakos sa paghiusa sa labing makahuloganong mga kawsa nga makaumol sa ilang ugma. Lahi sa Sugbuanong mga politiko, ang kadagkoan sa Bohol wa maglibog unsay mas mahinungdanon tali sa pagpanalipod sa kinaiyahan ug sa ekonomikanhon nga kalihokan.
Pila lang ka adlaw human nitumaw ang mga reklamo sa paglawog sa mga tuki sa kadagatan sa lungsod sa Lila sa habagatang bahin sa Bohol aron pagdani sa lokal ug langyaw’ng mga turista, nagkauyon dayon ang lokal nga mga opisyal sa pagbadlong sa kalihokan.
***
Managsama ang baruganan sa Kapitolyo sa Bohol ug sa Munisipyo sa Lila: Kinahanglang umulon una ang mga lagda sa pagbalanse sa panginahanglan sa pagpalambo sa lokal nga turismo ug panginabuhi sa mga mangingisda ug sa pagpanalipod sa mga tuki gikan sa wa kinahanglana nga pagpahimus.
Nahukman sab sa mga opisyal nga mapanday lang ang makiangayon nga ordinansa kon konsultahon ang tanang hingtungdan, di lang ang pribadong negosyante nga nagbuutbuot og pasiugda sa kalihokan kon dili apil nang mga molupyo, mga makinaadmanon sa kalikopan ug nahilambigit nga mga buhatan sa kagamhanan.
***
Angay’ng manlipaghong sa kauwaw ang mga tagduma sa Kapitolyo sa Sugbo ug Munisipyo sa Oslob. Nga mas unang gipasidan-an sa lokal ug langyaw’ng mga eksperto sa kadagatan sa dakong kadaot nga mamugna sa kinaiyahan kon padayunon ang paglawog og uyap sa mga tuki aron nga magbalikbalik sa bahin sa kadagatan nga tapokan sa mga turista.
Apan nahinaykan nang pagpahimus sa mga tuki sa Oslob: Natukod nang dugang hotels ug resorts, nabuhong nang panudlanan sa Munisipyo ug Kapitolyo, nabahinan nang mga mangingisda ug napiskan nang panginabuhi sa ubang mga molupyo.
***
Napanid-an hinuon karong bag-o nga nagkagamay ang mga tuki sa kadagatan sa Oslob. Mahimong pasidaan na nga di mahimong lubagon sa pagbubo og uyap ang ilang naandan nga pagbalhin-balhin sa labing haom nga mga bahin sa kadagatan.
Ambot nganong lahi sa mga tagduma sa Bohol nagdumili gihapon ang mga politiko sa Sugbo sa pagkat-on sa abundang mga pagtulon-an sa nagkalainlaing bahin sa kalibotan samtang nagkainit ang kalibotan: Makalahutay lang ang pagpalambo sa turismo kon mopahaom ug mopa-undayon, inay mobangga ug mosukwahi, sa kinaiyahan.
- Latest
