Kasinatian sa mga litsonan

Nakakita ko og karaang talad kan-anan sa usa sa mga lungsod sa habagatan kasadpang Sugbo nga may kanal-kanal gikan sa taliwa paingon sa nahimutangan sa matag nangaon. Matod sa hamtong nga mga molupyo ang kanal-kanal alang sa inagos sa inasal nga baboy sa taliwa sa talad.

Sa ato pa, sa karaang Sugbo nakakita ang atong katiguwangan og sayon nga paagi sa pagdiretso og bahog sa kan-on ug sa mas makiangayon nga pagbahin sa duga sa inasal. Ang gidak-on sa mga kanal-kanal nagtimaan nga mas basa ang mga inasal sa una.

* * *

May litsonan og baboy sa una nga nahimo nakong suki tungod sa tulo ka hinungdan: Una, lami; ikaduha, way baho; ug ikatulo, sayon rang sabuton. Wa ko ganahi sa ubang litsonan kay tsamba-tsamba ang ilang salida: Usahay, basa, usahay uga; usahay pagod, usahay hilaw; usahay parat, usahay tab-ang; ug usahay humot, usahay baho.

Apan bag-o nang tagduma sa akong kinaham nga litsonan. Wa na ko mopalit kay labihan nang mahala. Wa gani ko motilaw kon mao ba gihapon ang ilang timpla. Maong nisuway ko sa bag-ong nitumaw nga mga litsonan.

* * *

Nisuway ko sa kan-anan nga nangangkon nga mas himsog ang ilang mga sangkap ug paagi sa pag-asal. Humot tinuod, maayo og dagway ang ilang litson, apan kuwang sa lami. Gawas nga tab-ang, magduda ka kon litson o tsitsaron ba.

Nisuway ko sa laing kan-anan nga nangangkon nga nakasunod sa inasal sa karaang Sugbo. Mas lami ang ilang timpla apan may gamay’ng baho nga magduda ka kon nasunod ba sab nila sa kakaraanan o gitapolan lang og hinlo.

* * *

May karaang litsonan sa Sugbo nga gibantog nga gipalabi ang pagpabilin sa kalidad kay sa mas paspas nga pagpalapad sa produksiyon. Kinahanglan hinuon nga ang kustomer maoy moadto sa ilang litsonan. Nagsugod na sila og hatod karong bag-o apan di pa sama kasayon ang pag-abot nila.

Nakaila ang bag-o nakong suki sa iyang paghatod og inasal nga gitampo sa matinabangong tigpaminaw sa Grand Halad sa Kapamilya pila ka tuig ang nilabay. Sayon rang sabuton sa Facebook ug tag-iya ang mangunay paghatod. Wa pa koy nadungog nga reklamo sa iyang inasal --may kanal-kanal man o wa ang butangan.