Laing kaso sa mga Lim
Labing dakong sagpa batok sa mga pangangkon nga ang karaang sistema sa paghigpit sa importasyon sa bugas humay nakatabang sa mga mag-uuma mao ang kaso nga gipasaka sa Department of Justice (DOJ) batok sa Sugbuanong mga negosyante nga gipasanginlang nisabotahe sa suplay ug presyo sa bugas humay sa tibuok nasud.
Gipasanginlan sa DOJ si David Lim ug iyang asawa nga si Judilyne Lim ug ubang mga sinumbong nga nakalapas sa Article 186 sa Revised Penal Code pinaagi sa pagkonsabo pagkabayo sa mga kooperatiba sa mga mag-uuma aron pag-monopoliya sa industriya sa bugas.
***
Sukwahi sa gipatuo sa National Food Authority nga ang ilang mga lagda sa importasyon nipabor sa mga mag-uuma kay maoy gihatagan og kahigayonan pagkompra sa mas baratong bugas humay gikan sa ubang kanasuran, napamatud-an sa DOJ nga silang Lim ug kaubanan ang tinuod nga nabuhong.
Matod sa Office of the Prosecutor General sa DOJ nga gipamayran nilang Lim ang mga kooperatiba sa Kapatirang Takusa MPC, Ugnayang Magbubukid ng San Isidro Inc., Samahan ng Kapampangan at Katagalugan MPC, ug Samahan ng Magsasaka sa Kalawitan MPC aron masipong ang bugas.
***
Ubang mga sinumbong sa kaso sa magtiayong Lim:
•Davidson Bangayan, alyas David Tan, nga maoy gitumbok nga utok sa transaksiyon niadtong 2014;
•Elizabeth Faustino, nga gipasanginlang nihikay sa mga dokumento ug kuwarta alang sa mga kooperatibang Riverview MPC, Umasaka MPC, Sitio Muzon MPC, Sta. Cecilia MPC, Formosa MPC, ug GPI San Miguel MPC;
•Eleanor Rodriguez, nga gipasanginlang broker sa importasyon; ug
•Leah Echeveria, nga nipirma sa bank accounts nga giablihan alang sa importasyon.
***
Di na bag-o alang ni David Lim ang mga kontrobersiya. Gipasanginlan ang iyang DGL Trucks Inc. nga maoy consignee sa 30,000 ka sakong smuggled rice gikan sa Thailand nga nasakmit sa Bureau of Customs sa Sugbo niadtong Marso 1, 2002.
Manghod siya ni Peter Lim nga gipasanginlan ni Presidente Rodrigo Duterte nga drug lord ug nagtagu-tago na karon human gikiha sa DOJ sa pag-negosyo og shabu uban ni Kerwin Espinosa. Siya sab ang amahan ni David Lim Jr. nga gipasanginlan nga namusil sa nurse nga si Ephraim Nunal, nga iyang gikalalis sa trapiko niadtong Marso 19, 2017.
- Latest
