Alas ni Mangaoang
Nanagana na si Atty. Lourdes Mangaoang, ang isog ug mapailubon nga ni-detalye giunsa pagpalusot ang gibanabanang P11 bilyones nga shabu pinaagi sa upat ka magnetic lifters nga nasakmit sa bodega sa Cavite niadtong Agosto, nga magpaubos sa witness protection program (WPP) sa Department of Justice.
Kini human siya pahibaw-a nga usa sa mga kundisyon sa panalipod nga ihatag niya sa WPP mao ang pagdili na niya sa pakighinabi sa mga sakop sa media. Alang ni Mangaoang ang media ang labing lig-ong tigpanalipod gikan sa mga hulga sa iyang kinabuhi.
* * *
Nipasabot si Mangaoang atol sa Arangkada sa dyAB 1512 Abante Pa, Bisaya nga di siya ganahan nga magpakahilom tungod sa kadaghan pa sa kasayuran nga kinahanglan niyang ibutyag sa katawhan sa nangalisbo nga kahiwian sa Bureau of Customs, labi na atol sa pamunoan ni kanhi Customs commissioner Isidro Lapeña.
Kon ang WPP mahimo lang hinuon nga babag sa iyang tinguha, nitataw si Mangaoang nga mapugos siya sa pagpangita og laing paagi pagsagang sa mga hulga nga iyang nadawat basta nga di lang siya patak-umon sa iyang mga nahibaw-an.
* * *
Akong nasuta atol sa among pakighinabi nga wa pay klaro nga mga ebidensiya nga gihuptan si Mangaoang nga direktang molambigit ni Lapeña sa pagpalusot sa P11 bilyones nga shabu shipment. Gibalikbalik hinuon niya ang kadudahan nga mga lakang ni Lapeña nga mosukwahi sa pagtuo ni Presidente Rodrigo Duterte nga nalutsan lang:
• Ang pagsalikway ni Lapeña sa mas klarong X-ray images nga nagpakita nga may sud ang magnetic lifters; ug
• Ang paglusad ni Lapeña og kampanya pagpakauwaw ni Mangaoang apil nang paglambigit niya ni Daanbantayan Mayor Vic Loot.
* * *
Diin man gikan ang iyang kaisog? Mahimong natakdan sa Ilokano niyang amahan nga koronel sa Philippine Constabulary niadtong panahon nga wa pang kaabot og napu ang mga heneral. Mahimo sang naliwat sa iyang mas isog nga Manileña nga inahan.
Larinong mo-Binisaya si Mangaoang hangtod karon kay nagdako siya sa Dakbayan sa Davao ug kadaghan nadestino sa mga pantalan sa Mindanao ug Kabisay-an, kaduha dinhi sa Sugbo. Niinsistir hinuon si Mangaoang ang labing dakong sukaranan sa iyang kaisog mao ang kasegurohan nga nagsulti siya sa kamatuoran.
- Latest
