Typo ang posibleng lusot
Maayo tingaling magsabot silang Superintendent Reyman Tolentin, tigpamaba sa Police Regional Office sa Central Visayas, ug Chief Inspector Kenneth Paul Albotra, hepe sa Parian Police Station, unsaon pagtubag ang nitumaw nga mga pangutana tungod sa kahibulongan nga service record ni Police Officer 3 Eugene Calumba, ang polis nga napatay sa giingong pagpamanhig ni Barangay Tejero, Cebu City, councilman Jessielou Cadungog niadtong Hulyo 30.
Kay kon padayong magkatuiris ang ilang tubag, mosamot ang pagduda nga si Calumba di kasarangan nga polis ug nga ang mga tahas nga gisangon niya di kasarangan nga pamolis.
***
Inay molihay, angay’ng direkta nilang tubagon ang mosunod nga kalibogan nga mga bahin sa service record ni Calumba nga si Tolentin ra sab ang niboluntaryo pagpagawas:
•Kasiyam siya ibalhin og assignment sa niaging siyam ka buwan --gikan sa Oktubre sa niaging tuig hangtod sa niaging buwan;
•May mga adlaw nga gidestino siya og duha ka managlahi nga mga dapit, Sugbo ug Sibulan niadtong Oktubre 9, 2017 ug Sugbo ug Laguna niadtong Hunyo 4 ning tuiga; ug
•Dihang napatay siya niadtong Hulyo 30, nadestino siya sa Traffic Patrol Group, di sa Parian.
***
Si Tolentin nipasabot nga wa pa ma-update ang service record ni Calumba. Kay iyang nahibaw-an nga nabalhin si Calumba sa Parian usa ka semana sa wa pa ang insidente.
Nan gagpas sab si Albotra nga wa ma-update ang service record ni Calumba. Apan lahi ang iyang katin-awan. Matod niya niadto rang Abril 12, 2018 nadestino si Calumba sa Parian ug wa na g’yud mabalhin. Apan di siyang kapasabot nganong naa sa service record ni Calumba nga nabalhin siya sa PRO-4A sa Calabarzon niadtong Hunyo 4.
***
Nabalaka hinuon ko nga modangop ang kapolisan sa labing sayon nga lusot ining mao’ng kontrobersiya. Kay di na man mabakwi ni malalis ang service record kay sila ra man say nagpagawas, mas lisod ang pag-angkon nga may dagon sa bilocation si Calumba, basulon na lang nila ang typographical error.
Mas sayon ang pagtulisok sa nag-encode sa service record. Inay pasanginlan na sab ang media nga wa kasabot ug nihatag dayon og malisya sa inosente nga dokumento, mas sayon ang pagtaktak sa nagduka nga clerk.
- Latest
