Mosulbong ug motibugsok
Bisan sa gikabalak-an nga laing dako nga uminto sa presyo sa mga produkto sa lana karong semanaha, nga modason sa makalilisang nga uminto niadtong Martes, niay balita nga mahimong pasikaran sa mga pangagpas nga di magpatuyang ang paglayat sa presyo sa kalibotanong merkado:
Gipahibawo sa Saudi Arabia, pangu sa Organization of Petroleum Exporting Countries (OPEC), ug Russia, pangu sa non-OPEC countries, nga dugangan ang ilang produksiyon sa lana og hangtod sa usa ka milyon ka baril sa lana matag adlaw. Nitidlom dayon og 3% ang presyo sa lana human sa pahibawo.
* * *
Gipasabot hinuon sa OPEC nga ang pagdugang sa ilang produksiyon atol sa ilang tigom sa Vienna sa sunod buwan di mosangpot sa pagbaha sa kalibotanong suplay, nga mao’y nakapatibugsok sa presyo sa niaging duha ug tunga ka tuig. Kay igo lang nilang tapakan ang dakong pagtidlom sa produksiyon sa lana sa Venezuela nga naputos karon sa grabeng politikanhong krisis.
Mao nga may sukaranan gihapon ang kahadlok nga mosulbong ang presyo sa lana hangtod sa $100 matag baril, gamay na lang og kuwang sa kinatas-an nga ang-ang nga naabot niadtong Hunyo 2014.
* * *
Gikabalak-an nga ang pagsige og saka sa presyo sa lana makapahagsa sa kalibotanong ekonomiya. Nga makapatidlom na sab sa demanda ug busa mopatibugsok na sab pagbalik sa presyo.
Inay mopalabi sa ilang kahakog sa pagpaburot sa ilang ginansiya pinaagi sa artipisyal nga pagpaubos sa suplay, giawhag ang OPEC ug non-OPEC countries sa pagpabilin na lang sa presyo gikan sa $70 ngadto sa $80 matag baril nga mao’y motino sa kinadak-an nilang kita.
* * *
May mas mahinungdanon nga pasidaan ang mga eksperto: Inihap na lang ang malipayong mga adlaw sa OPEC ug non-OPEC countries. Kay ang gitakdang pagpadagan sa 240 milyones ka sakyanan nga de kuryente unya sa 2040 mopapas sa $19 trilyones nga kita sa lana.
Samang mga eksperto nangagpas nga magsugod og tibugsok ang kalibotanong demanda sa lana sa tungatunga sa 2020. Mahimo ganing moabot og 8 milyones ka baril matag adlaw ang maiban sa panginahanglan sa kanasuran. Mao nga gipaabot nga molugapak ang presyo sa lana ngadto sa $32 matag baril, nga mao’y kinaubsan nga ang-ang nga naabtan sa tungatunga sa niaging tuig.
- Latest
