Sayop nga pagpangita

Patay man o buhi, dakpon g’yud kuno sa kapolisan ang nahibiling mga sakop sa Abu Sayyaf nga padayong nagtago karon sa kabukiran sa Bohol. Bongga kaayo ang pamahayag sa labaw’ng opisyal sa kapolisan sa Central Visayas.

Tingali makapagakpak sa kahinangop ug pagdayeg ang katawhan tungod sa pamahayag ni Police Regional Office (PRO)-7 director Noli Taliño. Apan klaro kaayo kun ngano nga wala g’yud makit-i sa kapolisan ug militar ang mga nagtagu-tago nga Abu Sayyaf.

Gibutyag sa kapolisan ug militar nga duha na lang ka sakop sa Abu Sayyaf ang padayong nagtagu-tago diha sa Bohol, human nga may usa nga ilang nadakpan didto sa Tubigon. Apan ngano nga hangtod karon wala g’yud nila madakpi ang tanan?

Nganong naglisud sila pagdakop sa laing duha na lang ka sakop sa Abu Sayyaf? Sigurado ko nga kadtong mga bandido nga ilang gipangita dili g’yud kini magpasaya-saya paglakaw nga sila makit-an sa mga lumolupyo. Sigurado nga anha sila moagi sa kalasangan, ug motago sa ngilit sa mga pangpang.

Apan tan-awa ang kapolisan nga nagpatrolya sa kabukiran sa Bohol nga nakuhaan og hulagway, anaa sila magsubay sa dalan nga agianan sa mga tawo. Nagkuyog ang tibuok grupo, mao nga dili nila madakpan ang mga gipangita nga Abu Sayyaf nga tingali tua ra sa kakahoyan naglantaw lang kanila.

Ngano nga dili man sila magbuwag-buwag ug suoton ang kalasangan? Ang paglakaw nila nga magkuyog makarisgo pa gani kanila ug posible nga mahurot sila og pangamatay kun atakehon sila sa kontra. Itsahan lang og granada ang maong nagpundok nga mga nagpatrolyang polis, hurot na sila.

Bansay ang mga sundalo ug kapolisan sa combat operation, apan tingali usahay makalimot sila sa tukma nila nga buhaton. Dili na lang nako ibatbat kon unsay tukma nga himoon sa pagpatrolya kay mahibulong unya sila kon ngano nga nahibawo ko.

Kun maglisud sila sa pagdakop sa tulo na lang ka Abu Sayyaf nga anaa nagtago sa kabukiran sa Bohol nga wala gani suporta sa katawhan, mas maglisud sila pagpuo sa mga sakop sa Abu Sayyaf nga nagbase sa Sulu ug Basilan.

Bitaw, tambag nako sa mga magpatrolya nga kapolisan ug kasundalohan diha sa Bohol, sudlaya ninyo sa pagsum-ok ang kalasangan kay sigurado g’yud nga inyong makit-an ang mga kontra nga bandidong grupo nga naghatag lang og kasamok dinhi sa ato.

Ayaw og hatagi’g higayon nga mabuhi pa sila. Dili angay’ng kaluy-on ang maong mga tawo kay mianhi sila sa atong lugar aron sa paghimo’g kagubot, mangidnap aron ipalukat og dakong kantidad. Unya, kamong mga sakop sa Coast Guard ug Navy, kinahanglang lig-onon ninyo ang inyong trabaho kay tan-awa, nalutsan mo og Abu Sayyaf.

Unya, angay’ng dalion sa paghimo’g imbestigasyon sa kadagkoan sa PNP Criminal Investigation and Detection Group ang kaso bahin ni Supt. Ma. Cristina Nobleza nga giingong nakigkunsabo sa mga bandidong grupo.

Angay siya nga silotan, bilanggoon ug padugtaon sa bilanggoan. Hinoon, ang balaod nagtugot ra nga ang usa ka tawo mabilanggo hangtod lang sa pangedaron nga 70-anyos.