Isyu sa Grab ug Uber
Dili ko supak sa operasyon sa Uber ug Grab cars, apan ang wala nako mauyoni kay ang mga operators niini misugod na pagpamasahero bisan og wala pa gani makakuha og pagtugot gikan sa kagamhanan.
Wala magdili ang Land Transportation Franchising and Regulatory Board (LTFRB) nga maka-operate ang Uber ug Grab Cars, apan kinahanglan nga maghuwat sila nga hatagan og permit.
Dinhi sa dakbayan sa Sugbo, gihunong man gani ang paghatag og dugang prangkisa sa mga taxi units kay nasuta nga puwerteng daghana na g'yud sa mga taxi. Kapin sa 6,000 ka taxi units ang anaa sa record sa LTFRB.
Daghan ang mituyo g'yud pagpalit og mga bag-ong sakyanan kay natental sa Uber ug Grab. Ang kapin sa usa ka libo ka sakyanan nga nagpa-accredit karon sa Uber ug Grab, nakapasamot sa grabeng problema sa trapiko.
Bisan diha sa Facebook ug ubang social media, nagpadayon ang mga tawo nga nagpaluyo sa operasyon sa Uber ug Grab, sa pag-agni og dugang mga kliyente.
Wala nila tug-ani ang mga tawo nga nanag-iya og mga sakyanan nga dili pa sila legal nga makapamasahero kon igo ra sila nga na-accredit sa Uber ug Grab, kay kinahanglan pa sila nga mokuha og pagtugot sa LTFRB.
Anha ra sila masayod nga nahulog sila sa laang panahon nga sakmiton na sa mga tinugyanan sa balaod ang ilang sakyanan kon masakpan nga namasahero nga kuwang sa dukomento.
Daghan pa nga sakyanan nga nasakpan sa LTFRB ug Land Transportation Office (LTO) ang wala pa malukat tungod sa kadagko sa multa. Ang multa sa mga kotse nga masakpang gamiton sa pagpamasahero P120 mil, samtang P200 mil ang multa sa van nga gamiton sa kulorum.
Gawas sa maong dagko nga multa, ang sakyanan dili usab dayon i-release ngadto sa tag-iya kay ang lagda tanggongon pa kini og tulo ka buwan gikan sa adlaw nga kini gidakop.
Kini maoy angay'ng hinuktokan pag-ayo sa mga tag-iya og sakyanan nga posibleng wala gayud masayod sa tinuoray nga sitwasyon. Mentras wala pa kamo masulod sa dakong kompromiso, hinuktuki usa pag-ayo.
Usa ka retiradong kawani sa kagamhanan mitug-an kanako nga gigamit niya ang iyang gamay'ng retirement pay sa pag-down og kotse kay natental siya sa nindot nga pasalig, apan karon naproblema kay nadakpan ang iyang sakyanan.
Wala'y ikabayad sa P120 mil nga multa, mao nga wala gayud malukat ang iyang sakyanan ug nag-anam kadako ang iyang binuwan nga bayranan sa sakyanan nga wala kabayri.
- Latest
