Rama magkonsehal na lang?

Ang akong mga amigo nga konsehal sa Team Rama mitug-an nga si kanhi mayor Michael Rama dili na mamugos kon ang kadaghanan kanila mosugyot nga dili na lang siya mokontra pa ni Mayor Tomas Osmeña sa piniliay unya sa 2019.

Gitug-anan ko ni Konsehal Raymond Garcia nga atol sa ilang miting pipila ka adlaw ang milabay, giingnan sila ni Rama nga mahimong molansar siya bisan unsa nga katungdanan, apil ang pagka konsehal sa dakbayan.

Bitaw, mao na ang husto nga maminaw gyud sa huna-huna sa mga kaalyado. Ang sipyat gud ni Mayor Rama kay subra kaayo ang iyang pagsalig sa mga kapitan sa barangay nga mipalaum gyud niya nga daog ang tanang kandidato sa Team Rama.

Kami gani nga mga reporter nga nag-cover sa City Hall makabantay na man kon kinsa ang kandidato nga modaog. Tiaw mo nga sa south district dinhi sa dakbayan, modaog gyud kuno ang tanan nila nga konsehal sa miaging piniliay.

Bisan si Mayor Rama akong gisultian daan sa wala pa ang eleksyon nga sayop ang ilang pangagpas. Natan-aw na namo daan nga molusot gyud sila si Konsehal Margot Osmeña ug Eugenio Gabuya, ug imposible ang ilang giingon nga 8-0.

Mas maayo pa nga apilon nila pagpangutana ang media nga naniid sa sitwasyon sa politika sa kabarangayan. Ang akong tan-aw karon, angay'ng maninguha pa gyud pag-ayo si Rama kon magplano siya nga morebansin ni Osmeña sa umaabot nga eleksyon.  Nakadaog man gani si Osmeña nga dili siya ang mayor, unsa pa kaha karon nga siya na ang mayor? Husto ang baruganan sa ubang konsehal sa Team Rama nga akong napangutana nga gusto sila nga lahi lang nga puwesto ang daganan ni Rama.

Pero akong klaruhon nga si Rama, dunay mga maayong binuhatan atol nga siya mayor pa sa dakbayan. Usa sa gidayeg nako mao ang tinguha ni Rama nga mahibalik ang naandan nga gidak-on sa karsada nga gianam-anam pag-ukopar sa mga mapahimuslanon.

Mao kini ang wala mahatagi og pagtagad sa administrasyon karon ni Mayor Osmeña tungod kay ang mga kawani sa City Hall nga gitahasan unta niining maong gimbuhaton, nagkangkang lang ang kamot nga modawat sa suweldo apan wala motrabaho niini.

Kabahin sa "beautification programs" sa siyudad, maayo si Rama, apan wala usab maatiman ni Rama ang problema sa pagpangolekta sa buhis mao nga kanunay'ng ubos kaayo ang tax collection sa City Treasurer's Office atol sa iyang administrasyon.

Ang nindot gyud unta nga silang duha si Tommy ug Mike magbalik sa pag-uban, ug niana, sigurado ko nga molambo ang atong dakbayan.   Pero tan-aw nako, lisud pa nga magkauli ang duha ka haligi sa politika dinhi sa dakbayan. Kon ako maoy pangutan-on, angay nga si Rama maoy una nga moduol ni Osmeña ug moyukbo.

Mangutana mo og ngano? Taas kaayo ang sugilanon, apan mahimong si Rama kun interesado nga makigsulti kanako niini, andam ko. Kon maminaw ang kanhi mayor kanako, daghang punto nga akong mapasabot isip beterano nga reporter nga nag-cover sa politika sa dakbayan sa Sugbo.