Legal ba ang gihimo ni Tommy?

Daghan gyud ang nakadayeg ni Mayor Tomas Osmeña tungod sa pagrisgo niya sa iyang kinabuhi dihang miadto siya sa gipuy-an ni David Lim Jr. kaniadtong Domingo sa gabii aron dakpon tungod sa pagpusil niini sa usa ka nurse nga iyang gikabangi tungod sa trapiko.

Bisan tingali ang ubang kritiko sa mayor, sa hilom nakadayeg sa iyang gibuhat. Mao kini ang ganahan kaayo sa katawhan nga isog ang ilang lider, sama ni Presidente Rodrigo Duterte nga mibahad na daan nga pamatyon ang mga drug lord ug pusher kun siya makadaog.

Gusto gyud gani unta ni Osmeña nga paisyuhan og warrant of arrest sa hukmanan aron maoy basehan sa kapolisan pagdakop ni Lim nga gitumbok nga maoy mipusil ni Ephraim Nuñal nga nakaangkon og pinusilan sa iyang bitiis.

Husto ra ang gihimo sa huwes nga mibalibad sa awhag ni Osmeña kay dili man maisyuhan og warrant of arrest ang tawo nga wala pa mapasakai og kaso, ingon man masuta nga may basehanan nga nakahimo siya og salaod.

Ang kapolisan nagpadiki-diki usab pagdakop ni Lim mao nga napugos si Osmeña nga moadto sa gipuy-an sa suspetsado nga siya ra. Mao kadto nga napugos ang mga sakop sa Special Weapons and Tactics (SWAT) team sa pag-uban sa mayor.

Kuyaw ang gihimo ni Osmeña kay samtang ang mga sakop sa SWAT nagsul-ob og bulletproof vest, ang mayor nagsul-ob ra og t-shirt. May nangutana kon legal ba ang gihimo sa mayor.

Para kanako, ang gihimo sa mayor nga pag-adto sa dapit nga diin posibleng tua magtago si Lim, nahasubay gihapon sa balaod paghimo og hot pursuit operations base sa Rule 113, Section 5 (b) sa Rules on Criminal Procedures naglatid niini.

Ubos sa maong Rules of Court gitugot nga ang tawo dakpon sa mga otoridad bisan og walay warrant of arrest "when an offense has just been committed and he has probable cause to believe based on personal knowledge of facts or circumstances that the person to be arrested has committed it."

Ang giingon nga "probable cause" mao nga ang mga otoridad nakakuha og kasayuran gikan sa biktima o mga saksi kon kinsa ang naghimo sa krimen, diha-diha mahimo siya nga mosugod dayon sa pagpangita sa suspetsado.

Si Osmeña usa ka "person in authority" nga makahimo gihapon sa pagdakop, samtang ang mga polis maoy gitawag og "agents to persons in authority." Ang balaod nagtugot usab nga ang mga otoridad makahimo pagsulod sa balay nga gitagoan sa mga dakponon.

Gani ang balaod, nagtugot sa mga otoridad nga mahimong gub-on nila ang pultahan sa panimalay o building, kon gikinahanglan, aron makasulod sila ug madakop ang mga nakahimo og salaod.

Kay ang pag-adto ni Osmeña ug mga sakop sa SWAT sa balay ni Lim wala pa man molapas gani ang 24 oras gikan sa pagkahitabo sa krimen, maisip nga legal ang ilang gihimo.

Ang nindot nga buhaton ni David Lim Jr. mao ang pag-surrender ug tubagon ang pasangil. Kon dili man siya ang nagpusil ni Nuñal, nganong mitago man siya? Kon siya man ang nagpusil, nganong dili man siya moatubang kon igo lang siya nga nanalipod sa iyang kaugalingon?

[email protected].