Musika sa iyang kinabuhi

Name:Emmanuel L. Abellana

Nickname:Emman

Age:48

Date of Birth:January 24, 1969

Place of Birth:Cebu City

Favorite Singer:Michael Card

Favorite Song:Song of Solomon (Arise My Love)

Gipakasentro sa  48 anyos nga si  Emmanuel  Abellana  ang musika sa iyang kinabuhi.

Tungod niini, nahatagan og dakong bili ang iyang pagkatawo.

Nahimong instrumento ang  musika sa  kalampusan sa iyang  pagtungha kung diin nakadawat siya og  tabang  sa pipila ka religious sectors pinaagi sa iyang pagpaambit sa iyang kasinatian sa mga tawong nanginahanglan og igong kahibawo sa natad sa musika.

Ang musika alang ni Emman ,usa ka gasa nga gipaambit kaniya sa labaw'ng makagagahum nga kinahanglan usab niyang gamiton .

Bata pa lang si Emman sa dihang nabantayan niya ang iyang pagkamahiligon sa musika sa dihang matag panahon nga makakita siya og gitara, dako gyud ang iyang kagustuhan nga makatugtug niini. Tungod sa mao niyang tinguha, hinay hinay siyang nakat-on niini.

Ug didto  na nagsugud ang pagkahimugso sa iyang tinagoang talento ug ang iyang dakong paghigugma sa musika.

Karong bag-o lang, mapaubsanong gipaambit ni Emman ang iyang kadaugan sa 37th Cebu Pop Festival kung diin siya maoy migawas nga grand winner sa  Tingog sa Kabataan category alang sa komposisyon niya nga  "Singgit Kabataan."

Mapasigarbuhon usab niyang gipaambit nga lakip sa interpreters niini mao ang iyang duha ka anak nga mga lalaki nga mga seminarian sa Pope John XXIII Seminary nga sila si Augustine Mary Abellana ug Bernadino Jose Abellana.

Ang ubang interpreters mao sila si  Ezekiel Alcain, Jeddah Baguio, Freida Lune Casquejo ug Erika Cabillon.

Gipabuhagay usab niya nga gawas sa pagsalmot niya sa Cebu Pop, matag tuig usab siyang mosumiter og entry sa Huniño kung diin nahatagan usab siyag kahigayunan niini kaniadto nga mahimong grand champion alang  sa gi- compose niya nga awit nga Santo Niño Kaluwasan Ko.

Naangkon usab niya ang ikaduhang ganti sa labing unang Halad Awit sa Birhen Sa Regla Songwriting contest niadtong tuig 2009.

Luyo sa maong mga pasidungog nga naangkon ni Emman, usa ka butang ang gusto niyang pahimug- atan sa iyang pagkatawo ug kini mao ang mahisama ni San Pedro Calungsod nga bisan sa kalinghud pa sa edad niini , gihalad gyud niini ang iyang kinabuhi sa simbahan pinaagi sa pag -alagad ug pagtabang niini.

Alang kaniya, iya gyud nga gamiton ang pagkamahiligon niya sa musika alang sa labaw'ng makagagahum.

BNH: Nganong dali ra man ka maka-compose og kanta?

Emman: Kung duna ka’y gugma ug inspirasyon panahon nga ikaw mag-compose dali ra gyud.Dili kinahanglan nga imong lingkoran aron makahimo dayon ka og kanta. Bisan maglakaw ka sa dalan ,usahay mogawas lang gyud sa imong hunahuna ang melody. Apan lahi kining kasinatian nako sa Hunino, kun magsugod na kog compose alang sa Balaang Bata mas dali kong makatagik sa musika kung ang Iyang imahen ni Santo Niño akong ipaatubang nako sa akong piano o gitara.

Kana bang mora ka’g nakig-istorya niya.  Mao gyud nay akong nabatyagan ug akong mabati nga ma-inspire gyud ka'g padayon aron mahuman ang akong gihimo nga kanta

BNH: Unsa'y imong ikatambag sa aspirant composers karon?

Emman: Padayon ug ayaw’g hunong sa pag-compose.  Moabot ra gyud na ang panahon nga ihatag na sa inyoha. Ayaw sad gyud kalimot, apili pud  og halad , compose og awit alang kang Mama Mary during sa Original Marian Song Festival matag tuig kada September.

BNH: Unsa ang dakong hagit nga imong nasugatan isip usa ka composer?

Emman: Kining hatagan ka og deadline sa pag-submit sa imong 3-4 entries o kaha usa ka semana nga imong humanon ang imong gi-compose kay deadline na , unya ang imong gihunahuna tua pa sa imong trabaho sa opisina.   Kining bag-o lang nga songwriting alang kang Obispo Teofilo Camomot nga nahimo nako sulod sa duha ka adlaw kay deadline na pagka- ugma. Ampo ug salig lang gyud ko ni Bishop nga iyang ihatag ang mga letra ug huni. Salamat sa Ginoo ug ni Bishop Teofilo, ang maong awit nahimong usa sa mga finalists sa 1st AwiTeofilo Songwriting Festival karong Marso 3, 2017 didto  sa iyang Chapel sa  Valladolid, Carcar.

BNH: Sa tanan nimong gi- compose nga mga kanta, unsay nagmarka gyud nimo?

Emman: Kining awit nga Daghang Salamat, O Santo Nino nga maoy kanunay’ng pagaawiton sa Santos nga Misa sa Santo Niño Pilgrim Center.

BNH: Unsang panahona nga  daghan ka'g ma -compose nga mga kanta?

Emman: Sa higayon nga ganahan ko o inspired ko anang higayona, Kung dunay songwriting contest unya hapit na ang deadline ug dunay magpahimo nako sama sa jingle ug himno.

BNH: Giunsa nimo pagpaambit sa imong talent sa religious aspect?

Emman: Diha sa pagserbisyo sa simbahan isip parish choir trainor, sa mga religious communities and organizations, pag-compose og mga gozos alang sa mga santos sa Himno Alang Kang San Antonio De Padua, Gozos ni San Isidro Labrador, Gozos ni San Vicente, mga Tono sa Salmo nga gipanggamit sa mga Misa ug uban pa.

BNH: Kinsa'y imong gihimong inspirasyon niining tanan nimong gibuhat isip composer?

Emman: Ang akong gugma sa Dios ug sa akong asawa ug mga anak ug ubang mga compositor nga mihalad sa ilang talento ngadto sa Ginoo sama nila ni Msgr. Rodulfo Villanueva, Fr. Manoling Francisco ug ubang mga malampusong compositor/ musicians sa Sugbo nila ni Dennis Sugarol ug Manny Lapincao.

BNH: Sa unsa nga paagi nakatabang nimo'g dako ang Cebu Pop.?

Emman: Dugay nako nangandoy nga makaapil ug mahimong finalist sa Cebu Pop apan mora gyud og tungason kaayo ang pagsulod sa top 12. Ikaduha pa kini nako isip finalist sa Cebu Pop. Ang unang sulod sa finals niadtong tuig 2014, 34thCebuPop Music sa kantang “BAHA” apan wala makadaug. Makaapil ug makasulod lang ka sa top 12, dako na kaayong garbo alang kanimo ug makaila nimo ang ubang iladong compositor sa Sugbo, lipay na kaayo ko  niana. Siyempre ang ganti nimong makuha nga 100 thousand, dako kaayo'g ikatabang financial sa imong pamilya.

BNH: Sa imong personal nga kasinatian, kanus-a man nahimong managlahi ang singer ug ang composer?

Emman: Ang composer maoy naghimo ug nagtagik sa kanta, ang singer maoy mo-interpret sa imong gihimo nga kanta. Mas mailhan sa publiko ang singer kay sa compositor kay ang iyang tingog mao may mapatik pirmi ug madungog sa katawhan. Sagad sa mga composer kamao gyud mokanta ug dili yabag.  Mao nang kung ang usa ka compositor,  igo lang mopahimutang sa tono ug letra apan dili gyud mokanta bisan sa iyang composition, morag diha ra sila managlahi. Kay nindot man gud nang ang imong pakantahon sa imong composition kadtong nindot ug sikat pud labi nag songwriting contest. Apan pwede ra gyud ang composer,  siya pud ang singer o kaha mo interpret sa iyang kanta.

BNH: Nganong importante man gyud nga magkasinabot ang singer ug ang composer?

Emman: Bisan sa pagsugod pa lang daan sa pag-compose, isip composer naa na kay idea kung kinsay angayan nimong pakantahon sa imong composition. Kinahanglan gyud magkasinabot daan labi na kung dunay dagkong ganti nga madawat. Sa akong kasinati-an, ako gyud nang istoryahan daan ang interpreter sa akong ihatag sa iyang pag- interpret.Kung makasulod sa top 12 ,pila iya dawaton, kung makadaog sa finals pilay iyang madawat isip interpreter. Kung dili madala sa top 12, during ra sa demo nga CD  nga  i-submit,  hatagan lang para snack ug plete.  Ingun ana ka importante aron malikayan ang panaglalis kung naay madawat, labi na kung moapil na ang ginikanan o kaha ubang mga back-up singers ug dancers, dapat istoryahan daan kung pila ang ibayad sa talent fee nila kay songwriting mani,  dili man singing contest.