Duwa ni Mayor Espinosa?
Sud sa pila ka adlaw human nibalik si Mayor Rolando Espinosa Sr. sa munisipyo sa Albuera, Leyte niadtong Agosto 16 ning tuiga, nagdumili siya sa paggawas, bisan sa paglili na lang sa bintana sa iyang buhatan. Gawas lang sa pila ka gutlo nga pagwara-wara sa iyang mga dumadapig nga nihangop sa iyang pagbalik, nagtago si Espinosa sa kahadlok nga patyon siya sa kapolisan.
Karon si Espinosa nagpaabot na lang sa pag-aprobar sa Department of Justice sa iyang tanyag nga mahimong state witness batok sa mga opisyal sa gobyerno ug pribadong mga indibiduwal nga iyang gilambigit sa negosyo sa ilegal nga drugas sa iyang anak nga si Rolando “Kerwin” Espinosa Jr.
***
Sa wa pa mopirma sa iyang pito ka pahina nga affidavit nga gikatahong nihingan sa mga opisyal sa kapolisan, mga kongresista ug usa ka senador, si Espinosa may sukaranan nga mahadlok sa mga polis sa iyang kaugalingong lungsod. Ang sunudsunod nga mga ronda sa iyang compound nakasakmit og shabu, mga armas ug kuwarta nga nakapalig-on sa mga kaso batok niya.
Matod sa Sugbuanong hepe sa kapolisan sa Albuera nga si Chief Inspector Jovie Espenido nahadlok si Espinosa nga iyang pusilon. Maong si Espenido ang usa sa labing nahibung dihang pagka Agosto 23 wa lang mogawas si Espinosa sa munisipyo niadto pa gyod sa presinto ug nakigsulti sa kapolisan sud sa lima ka oras.
***
Nitug-an si Espenido sa DYAB Radyo Patrol nga mahimong nilampos ang iyang pag-apiki sa mga Espinosa. Nikumpisal man gani nga mora siyang nideklarar og martial law sa Albuera.
Gipaputlan niya og suplay sa kuryente ang munisipyo ug ang hotel nga gipanag-iya sa mga Espinosa. Nisugot ang Leyte Electric Cooperative (LEYECO) tungod sa kadako na sa utang sa kuryente sa mga Espinosa. Nahibalik hinuon dayon ang kuryente sa munisipyo apan wa na kaabli og balik ang hotel kay niabot og P1.5 milyones ang utang sa mga Espinosa sa LEYECO sa niaging unom ka buwan.
***
Karon nausab nang tuno sa Malakanyang. Human gipasanginlan si Mayor Espinosa nga nagpa-goryo-goryo lang sa dako niyang kalambigitan sa sindikato sa ilegal nga drugas sa tibuok Eastern Visayas, gideklarar na siya ni Presidential Chief Legal Counsel Salvador Panelo nga least guilty, maoy labing gamay og atraso sa ilegal nga mga transaksiyon sa iyang anak nga si Kerwin ug sa ilang mga protektor.
Nakumbinser ba gyod ang kapolisan sa pamalibad ni Mayor Espinosa nga wa siyay labot sa drugas, gani gibadlong na niya si Kerwin? O kabahin lang ni sa gipahibawo ni Presidente Rodrigo Duterte nga pag-intriga sa mga durugista aron nga mag-unay ug mabisto ang mas dagko nga mga haligi sa mga sindikato sa ilegal nga drugas?
- Latest
