Pagpanilhig sa tugkaran

Kon may nahibung pa hangtod karon nganong naapil si Arsobispo Luis Antonio Cardinal Tagle sa mga listahan sa gihugunhugon nga mahimong mapili pagka Santo Papa human sa resignasyon ni Benedict XVI niadtong 2013, nakasaksi na sila sa talagsaon niyang katakos atol sa iyang pag-atubang gahapon sa kaliboan ka lokal ug langyawng delegado sa 51st International Eucharistic Congress.

Kon may nahibung pa nganong usa siya sa labing pinasidunggan nga katekista sa niaging duha ka IEC (sa Dublin, Ireland sa 2012 ug Quebec, Canada sa 2008), gipamatud-an ni Tagle nga mahimo niyang mapasabot ang labing komplikado nga mga konsepto sa kultura ug Santos nga Misa sa labing yano ug masabtan nga mga pung.

* * *

Ug wa siyay kahadlok pagbuyag sa labing tag-as nga mga haligi sa Simbahang Katoliko ug ubang sektor sa katilingban. Nahugyaw ang mga delegado sa IEC, nga solemne nga naminaw sa catechesis sa nangaging mga adlaw, dihang gipadayag ang iyang paniid nga mga kardinal ug mga obispo ang nagpabantang sa atubangan samtang naghuot sa suok sa IEC Pavilion ang kasarangan nga mga delegado.

Klarong niapil og hugyaw ang mga delegado nga labing sayo nga nangabot matag adlaw sukad sa pagsugod sa IEC busa, nakalingkod sa atubangan, apan gipabalhin ra sa luyo sa pagpangabot na sa nauwahi nga mga prinsipe sa simbahan.

* * *

Labaw sa kamada sa mga delegado sa IEC Pavilion, mas makahuloganon ang witik ni Tagle sa iyang kaubanang mga haligi sa simbahan atubangan sa gisubli-subli na nga awhag ni Pope Francis nga di sila angay’ng magpasilbi kay sila ang angay nga mosilbi sa katawhan.

Mas naigo ang pipila sa nagtapok nga mga kardinal ug obispo ug pari dinhi sa Sugbo ug ubang bahin sa kalibotan nga hangtod karon nagpabungul-bungol, kon wa man hingpit nga nisukwahi, sa kamandoan ni Pope Francis pagsalikway sa tanang kaluho ug sa pagpaduol sa Simbahang Katoliko ngadto sa katawhan ug pag-alagad sa labing kabos, labing masakiton ug labing nagkinahanglan.

* * *

Wa pa mahuman si Tagle sa paggamit sa IEC nga kahigayonan sa pagpanilhig sa iyang kaugalingong nataran--gihimo ang simbahan ug kaparian nga sanglitanan sa kultura nga nagrepresentar sa matang sa ilang liderato:

• Kon mas dako ang parking area kay sa formation centers sa ilang mga parokya;

• Ang distansiya sa mga manimbahay gikan sa altar sa simbahan;

• Ang gidak-on sa higdaanan sa pari, kon tinuod silang celibate kinahanglan nga usa ray masud sa ilang katre;

• Gisalikway ba sa mga obispo ang ilang kaparian nga sukwahi og panghunahuna o gihangop ba ang bag-ong mga ideya pagpalambo sa pagduma sa ilang mga parokya; ug

• Gihangop ba sa kaparian ang mga lagda ug mga tambag sa ilang mga obispo nga mahimong makatsamba pagtabang nila.