Binay mapugos na pagtubag

Naghinam-hinam ang publiko nga tubagon na ni Vice President Jejomar Binay ang mga pasangil kaniya nga naglambigit og kurapsyon.

Kini human nga ang Makati Regional Trial Court mihukom nga husayon na niini ang kaso nga libel nga gipasaka ni Binay batok sa mga tawo nga mipasangil kaniya og pagpangawkaw.

Nangayo og P200 milyones nga danyos si Binay. Daghan ang iyang gikiha nga naglakip ni Kongresista Edgar Erice, Senador Alan Peter Cayetano nga sakop sa Senate Blue Ribbon Committee.

Apil sab sila si Senador Antonio Trillanes IV, Ombudsman Conchita Carpio Morales, si kanhi Makati City Vice Mayor Ernesto Mercado ug ang usa ka mantalaan nga nagpublikar sa report.

Nindot ni kay atol unya sa paghusay sa kaso, mahimong molutaw ang kamatuoran kon kinsa ang namakak. Si Mercado maoy miingon nga si Binay, dihang mayor pa sa Makati, mipaburot sa presyo pagpatukod sa Makati City Parking building ug uban pa nga proyekto sa Makati.

Angay nga panalipdan ni Binay ang iyang kadungganan, ug si Mercado kinahanglan nga mangandam pagpresentar sa iyang mga dukomento aron pamatud-an ang iyang pasangil.

Wala pa ko malimot nga apil sa pasangil batok ni Binay mao ang pagpanag-iya niya og 300 hektareyas nga hacienda didto sa Rosario, Cavite ug wala kini maapil sa iyang Statements of Assets, Liabilities and Networth (SALN).

Hapit na ang eleksyon mao nga kinahanglan nga molutaw na ang kamatuoran bahin sa mga isyu ni Binay. Kon dili kini kahatagan og maayong tubag ni Binay, sigurado ko nga apektado ang iyang kandidatura.

* * *

Nalingaw kaayo ang mga tawo nga namati sa mga tubag ni Davao City Mayor Rodrigo Duterte diha nga gi-interview siya ug gipakita sa telebisyon kaniadtong Miyerkules.

Ambot, mahakatawa ka man gyud nga maminaw sa ipanulti ni Digong. Mura ba og magsagol ang atong bation, sama nga malipay ta kay kuno pamatyon niya ang mga drug pushers apan magduha-duha ka 'sab sa pagtuo.

Tiaw mo, tulo ngadto sa unom ka buwan lang kon mapili kuno siya nga presidente, masulbad na ang problema sa drugas? Diha nga misuway ko pagsulod sa politika kaniadtong 2007, napilde ko kay susama niini ang akong plataporma.

Giingnan ko sa amigo nako nga election officer nga nasayop ko sa akong gihimo. Dako kining sayop ni Digong kay ang mga drug pushers, botante baya ug daghan 'sab ni sila.

Posible nga adto na sila mobotar ni Mar Roxas kay misaad man kini nga hatagan niya og pagtagad ang mga naulipon sa drugas aron sila mahaw-as ug makabalik sa matarong nga dalan sa kinabuhi.

Si Senador Alan Peter Cayetano maayo sab manubag sa pangutana, apan usa nako ka amigo mitug-an nga mas popular sila si Senador Chiz Escudero ug Bongbong Marcos sa pagka bise presidente.

Mura'g biya man gani kuno'g gamay si Leni Robredo nila ni Chiz ug Bongbong. Kon mao ni, makaingon ko nga sila si Chiz ug Bongbong ang magtigi pagka bise presidente.

Dugay na ko nga nangagpas kaniadto pa nga mas kusog si Chiz kay sa ubang pilionon sa pagka bise president kay milansar man gani unta ni kaniadto pagka presidente apan miatras lang aron mahatagan og higayon si Presidente Aquino nga senador pa niadtong higayuna.

* * *

Ako gyud nga pasalamatan ang mga bombero nga nagtinabangay pagpawong sa sunog nga miulbo sa Upper Sitio Fatima, sakop sa Barangay Apas kaniadtong Miyerkules sa hapon.

Nakita gyud nako giunsa nila pagpaningkamot aron pagpawong sa kayo. Sudlonon kaayo ang nasunogan nga dili na masulod sa mga trak sa bombero kay anaa man kini sa kilid sa bungtod nahimutang.

Gisumpay-sumpay nila ang 18 ka hose aron lang gyud ang tubig makaabot sa nasunogan. Wala gyud sila mipauli hangtod nga ilang nasiguro nga ang kataposang baga, mapawong. Bravo!