Ayaw mo pamugos uy

Kon ang University of the Philippines mohatag og relocation site ngadto sa mga biktima sa sunog diha sa Sitio Avocado sa Lahug, dili tingali angay nga mamugos gyud ang mga fire victims nga anha sila mobalik sa pagtukod og balay sa yuta nga tukoranan og tunghaan.

Dili man layo ang Barangay Busay nga adto sila hatagan og dapit nga katukoran nila'g panimalay. Daghang tinun-an nga mga lantip og salabotan ang matabangan kon ang UP makatukod og dugang school building diha sa dapit nga nasunogan.

Matud ni UP Dean Liza Corro nga dugay ra nga gigahinan og kuwarta ang pagpatukod og dugang school building sa UP-Cebu Campus, apan napundo lang kay ang dakong kabahin sa yuta sa tunghaan giukopar man sa mga "illegal occupants."

Lapad man gud kaayo kining yutaa nga gidonar kaniadto sa Kapitolyo ngadto sa UP, unya kay wala man nila gikoral, gipangtukoran og panimalay sa mga tawo. May yuta sab ang UP didto sa Talisay, mao gihapon, gipasagdan og giukopar sa mga squatters hangtod karon.

***

Milutaw na gyud pag-ayo nga si Rodrigo Duterte suod sa mga rebelde. Mao kini ang rason nga ang sundalo nga gibihag sa mga rebelde sulod sa 104 ka adlaw, didto kang Duterte gi-release kaniadtong Disyembre 31.

Miadto gyud si Duterte sa usa ka barangay sa kabukiran sa Butuan kay didto man gihimo ang pag-release sa mga rebelde sa dinakpan nila nga sundalo sa kagamhanan.

Misaad ang mga rebelde nga mopaluyo sila sa kandidatora ni Duterte sa pagka presidente sa nasud. Dili kini maayo og epekto kang Duterte kay daghan sa iyang mga dumadapig, tingali ilabi na ang mga militar, moyamiid na kaniya.

Kadtong mga wala makagusto sa kalihukan sa mga rebelde sigurado gyud nga molikay ug dili na sila mosuporta kang Duterte. Mabasa nimo diha sa social media nga adunay mga tawo nga kaniadto grabe nga misuporta ni Duterte, apan karon miusab na sa ilang baruganan.

Dili imposible nga gi-itsapwera ni Luigi Quisumbing ang kandidato pagka bise presidente sa Partido Liberal nga si Leni Robredo kay bisan og sakop sa LP si Quisumbing, suod kaayo siya sa banay ni Senador Bongbong Romualdez Marcos nga kandidato usab pagka bise presidente.

Dili na lang nato idetalyi pa pag-ayo kon ngano nga suod kaayo si Luigi sa mga Romualdez. May nakabantay nga sa tarpaulin nga gipakatap sa lainlaing dapit sa Mandaue, wala ilakip ang ngalan ni Robredo. Kaluoy sab tawon ni Leni no nga giitsapwera lang ni Luigi?

Diha gyud nasayop ang LP nga gipili nila si Luigi nga standard bearer pagka mayor diha sa Mandaue, unya gisalikway sa LP si Konsehal Lolypop Ouano-Dizon, nga laing kandidato pagka mayor.

Dako gyud kaayo og nahimong sayop si Gobernador Junjun Davide kay siya man maoy provincial chairman sa LP, wala niya matimbang-timbang nga mas sikat si Lolypop kay ni Luigi. Tan-awa karon, kadudahan na si Luigi kon misuporta ba ni Leni o wala.

Resulta niini, kadtong mga dumadapig sa mga Ouano, dili na hinuon mosuporta ni Davide. Sa laktod, maibanan ang imong botos sir Jun. Unya sa pagka kongresista sab, mura'g biya si Jonas Cortes ni Dr. Paulus Cañete diha sa sixth district.

Natinuod gyud ang akong panagna nga daghan ang masuko ni Jonas tungod sa iyang plano nga kon siya modaog, himuon niyang "lone district" ang Mandaue. Sa ato pa, mabuwag na ang Cordova ug Consolacion. Asa na man lang tawon masakop ang duha ka lungsod?     

Matud sa akong amigo nga opisyal sa Cordova, dugay na diay nga nagsuroy-suroy si Paulus sa ilang dapit mao nga mas sikat siya kay ni Jonas nga karon na lang moadto panagsa.

***

Dinhi sa dakbayan sa Sugbo, giangkon ni suspended Mayor Mike Rama nga tungod sa nagsingabot nga eleksyon, dili gayud siya mohunong sa pag-bisita sa lainlaing mga barangay.

Usahay, mawani gud si Acting Mayor Edgar Labella kay magpatawag man gihapon si Mike og presscon.