Lahugay para piniliay
Magsugod na ang lapad nga lahugay sa mga opisyal sa kapolisan sa Sugbo ug ubang bahin sa Pilipinas pangandam sa piniliay karong Mayo. Gipahibawo ni Police Regional Office Director Manuel Gaerlan sa TV Patrol Central Visayas nga magsugod karong semanaha ang pagbalhin sa mga opisyal nga may mga paryente nga managan sa ilang mga hurisdiksiyon.
Gitino ni Gaerlan nga maapil sa lahugay ang mga hepe sa kapolisan sa mga lalawigan sa Sugbo ug Bohol, silang Senior Superintendent Noel Gillamac ug Senior Superintendent Dennis Agustin. Matod ni Gaerlan way atraso silang Gillamac ug Agustin apan kinahanglang pulihan kay niabot na og kapin sa duha ka tuig sa ilang katungdanan.
***
Apil sa magbantay ug posibleng manghilabot sa lahugay sa kapolisan ang mga managan sa piniliay sa Mayo 9. Interesado silang mahibawo kon ang lahugay makatabang o makadaot sa ilang pamolitika. Mosuway sila pag-influencia sa lahugay aron nga ilang suod nga mga opisyal ang magduma sa kapolisan sa ilang lungsod, dakbayan ug lalawigan.
Kon di sila ingon ana kaduol sa luwag, nga di silang kapangugat sa Kampo Crame ug sa liderato sa Philippine National Police ug sa Department of Interior and Local Government, maningkamot sila nga di kalutsan og mga opisyal nga gidudahan nga tua kapusta sa ilang mga kaatbang.
***
May nadunggan kong mga sugilanon nganong mas epektibo ang kampanya batok sa vote buying niadtong 2013 kay sa nangaging mga piniliay, apan way opisyal sa kapolisan nga mangahas pagtino sa kasayuran:
• Gipasaligan ang mga hepe nga kon makasakmit og kuwarta nga para sa vote buying, di na kinahanglang itugyan sa PNP ang kuwarta, mahimong bahinon ra sa ilang mga sakop; maong
• Kugihan kaayong mga polis nga nag-checkpoint batok sa mga pagador nga nagda sa kuwartang ipamalit og boto; gani
• May mga politiko nga nitiyabaw nga may armadong mga tawo nga nanaka sa ilang kabalayan ug gisakmit ang tanang kuwarta nga gidudahang ipamalit og mga botante.
***
Segurong may giandam nang alkontra ang nangapaso nga mga politiko kon ipatuman na sab sa kapolisan ang samang taktika sa piniliay upat ka buwan na lang gikan karon. Maong di tang kapaabot nga ang pinalitay sa mga boto sama kabantang ug kagawasnon.
Makabentaha ang administrasyon kon gamiton ang lapad nga lahugay sa kapolisan pagdugang sa kahigayonan sa pagdaog sa ilang mga alyado. Kana kon ang pamunoang Presidente Noynoy Aquino, sukwahi sa tanan nilang pangangkon sa kaligdong, mosubli sa mga pangabuso ug paglubag sa mga lagda sa makiangayong piniliay nga gipasiugdahan sa iyang mga gipulihan. Ug kana kon ang kapolisan sa makausa pa magpakauwaw na sab sa pagpagamit sa gamhanang mga politiko pagluok, inay pagpatigbabaw, sa tinuorayng sentimento sa katawhan.
- Latest
