Mas taas nga bakasyon
Kon ang kasinatian sa bus operators ang basehan, mas daghan ang magpunsisok nga mga pasahero alang sa bakasyon sa bag-ong tuig kay sa niaging Pasko. Sa ato pa, kon naghuot na pag-ayong mga pasahero sa niaging semana, nga bisan sa adlaw sa Pasko taas pa gihapon ang linya sa natanggong nga mga pasahero, gikabalak-an nga mas dakong problema ang atubangon sa mas daghang pasahero karong semanaha.
Hinaot nga nakat-on og leksiyon ang tanang hingtungdan--mga pasahero, bus drivers ug operators, mga tagduma sa mga terminal ug local government units--aron kalikayan nga malihian og kahimangod sa pagkatanggong ug kalangay sa mga biyahe ang umaabot nga 2016.
***
Sama sa ubang espesyal nga mga adlaw sa tuig, masubay ang pagkatanggong sa mga pasahero sa mosunod nga mga hinungdan:
•Ang pagdasok sa mga pasahero kay managsama mang adlaw ug takna sa bakasyon di lang sa mga trabahante kon di apil na sa mga estudyante, gawas lang sa bakasyon sa Pasko ug bag-ong tuig;
•Ang kakuwang sa buses tungod sa kalit nga pagsulbong sa gidaghanon sa mga pasahero, nga wa masulbad bisan sa special permits nga giluwatan sa Land Transportation Franchising and Regulatory Board; ug
•Ang kahuot sa trapiko nga nakapasamot sa kalangay sa mga biyahe kay dugay mang makagawas ug makasud pagbalik ang buses sa mga terminal sa Metro Cebu.
***
Lisod sulbaron ang kanihit sa buses. Kay di man mahimong magdugang og buses ang operators aron lang iparada ug di kapuslan sa kasarangang mga adlaw sa tuig nga mahibalik sa naandan ang gidaghanon sa mga pasahero. Dugay pa sang masulbad ang kahuot sa trapiko kay di matukod sa usa lang ka pamilok ang mass transport system ug bag-ong kadalanan ug mga taytayan.
May problema hinuon nga mahimong masulbad dayon: Ang kakuwang sa bus drivers. Kay binuntagay man ang biyahe, nangatug ang gikapoy nga mga drayber ug napundo ang ilang buses samtang nagkataas ang linya sa nagpaabot nga mga pasahero.
***
May dakong alas ang mga pasahero sa umaabot nga bakasyon sa bag-ong tuig: Mas sayo nga magsugod ang mas taas nga bakasyon busa di kinahanglan nga maglumba sila pag-ilog sa nihit nga buses sa mga terminal. Wa nay trabaho sugod karong Miyerkules, Disyembre 30, duha ka adlaw sa di pang bag-ong tuig.
Kon modeklarar ang mga kompaniya ug mga buhatan sa gobyerno nga kutob ra sa udto ang trabaho ugma, madugangan pa gyod og tunga sa adlaw ang lugway sa mga pasahero aron nga mag-ulhus-ulhos ug di magdungan pagpunsisok sa mga terminal. Kalikayan gyod untang kahasol kon giaprobahan pa sa Kongreso ang "Happy 8" nga balaudnon ni kanhi Kongresista Tommy Osmeña, nga pakyawon pagdeklarar nga holiday ang kataposang walo ka adlaw sa tuig.
- Latest
