Nalangay apan mahinayon

Mapatuman na gyod ang nalangay nga laslas sa plitehan sa mga sakyanang pamasahero sunod buwan. Mao ni gitino ni Kongresista Manny Iway sa Negros Oriental human gibasura sa Court Appeals ang petisyon sa usa ka party-list group batok sa pasiunang us-os sa flagdown rate sa mga taxi nga gimando sa Land Transportation Franchising and Regulatory Board.

 Matod ni Iway ang petisyon sa 1-United Transport Koalisyon (1-UTAK) maoy nakasangit sa paglaslas sa plitehan tungod sa padayong pagtibugsok sa presyo sa lana sa merkado sa kalibotan. Gipasaligan si Iway sa abogado sa 1-UTAK nga human napilde sa CA di na nila isang-at ang kontrobersiya ngadto sa Korte Suprema.

* * *

Gipasaka ni Iway niadto pang Agosto ang petisyon sa paglaslas sa plitehan sa public utility jeepneys, buses ug taxis.

Human sa pila ka semana nga kalangay tungod sa technicality sa publikasyon, napahigayon ang public hearing sa nasudnong buhatan sa LTFRB niadtong Septiyembre.

Gipaabot unta ni Iway nga mahimong sayo nga pinaskohan ang laslas sa plitehan niadtong Nobyembre. Apan hapit na lang mahuman ang Disyembre wa pa modis-og ang petisyon. Gipasabot ni Iway nga di kalihok ang LTFRB samtang nag-ung-ong pa ang petisyon sa 1-UTAK sa CA. Masaligon siyang wa nay babag sa paghatag sa mga pasahero sa makiangayon nilang bahin sa baratong lana.       

* * *

Kon maaprobahan na gyod sa LTFRB ang petisyon ni Iway, ang mosunod mao nay plitehan sa mga sakyanang pamasahero:

• P6.50 na lang ang minimum nga plitehan sa PUJs sa unang lima ka kilometro (inay P7 karon) ug 65 sentabos na lang ang patong sa matag mosunod nga kilometro (inay P0.90 karon);

• P30 na ang flagdown rate (i-recalibrate na gyod ang taxi meters, lahi karon nga gisuwat lang sa papel ug busa mahimo rang kalimtan ug supakon) ug P2.50 na lang ang patong sa mosunod nga 300 metros (inay P3.50 karon); ug

• Laslasan og P2 ang plitehan sa buses.

* * *

Human sa tawag ni Iway sa Arangkada sa DYAB Abante Pa, Bisaya! gikan sa Japan gahapon sa buntag, giawhag sa mga pasahero ang LTFRB nga P6 na lay minimum nga plitehan sa PUJs aron kalikayang lalis uban sa mga drayber nga di manukli kay peligrong magkuwang na sang mga sensiyong 25 sentabos.

Sa ilang bahin, ang mga drayber ug operators padayong nisupak sa laslas sa plitehan kay ang napuno sa ilang kita tungod sa baratong lana napapas sa kamahal sa spare parts (sa bahin sa operators) ug sa mas taas nga abangan (sa bahin sa mga drayber).

Mas lisod tuohan ang ilang argumento samtang nagpadayong pagtidlom sa presyo sa lana, nga nalaslasan na og sobra sa katunga sa niaging usa ug tunga ka tuig. [email protected]