Pagtanggong og pasyente
Naluya si Mary Ann Semblante niadtong Biyernes sa gabii sa iyang pinuy-anan sa Consolacion sa amihanang Sugbo. Nidangop siya sa Eversley Childs Sanitarium sa Dakbayan sa Mandaue. Nagpakita dayon sa iyang ID sa Philippine Health Insurance Corporation pag-abot sa tambalanan. Apan gipangitaan siya sa mga kawani og member's data record (MDR).
Gikuha sa iyang mga paryente ang MDR sa ilang bay una pa siya nahatagi og tambal. Pagka Sabado gipangayoan sa resibo sa iyang contributions sa PhilHealth una hatagi og dugang tambal. Pagka Dominggo sa buntag, gitugotan na sa doktor nga makagawas. Apan giingnan sa taga billing section nga di siyang kaggawas kon di makapakita og resibo sa labing bag-o niyang bayad sa PhilHealth. Gipatawag pang guwardiya aron pagsegurong di siya makagawas.
* * *
Si Mary Ann nga self-employed nipakita sa resibo sa Hunyo 30 sa iyang bayad sa third quarter (Hulyo hangtod sa Septiyembre). Gipaninglan siya og resibo sa bayad sa fourth quarter. Nidalidali siya og bayad pinaagi sa Western Union. Apan kay Dominggo man way PhilHealth nga makapahibawo sa ospital nadawat na ba.
Maong nangayo na lang og kuwarta si Mary Ann sa iyang iyaan. Kinsa nipada dayon pinaagi sa Kuwarta Padala. Apan wa sab ihatag ang kuwarta sa ahensiya bisan nagpada sa iyang ID ug authorization letter. Maong napugos ang pasyente pag-abang sa ambulansiya sa Eversley aron maoy mangunay pagkuha sa kuwarta.
* * *
Nakagawas si Mary Ann pagka Lunes na sa hapon. Nisuway siya pagpangayo og katin-awan sa kawani nga gidestino sa PhilHealth claims. Apan giingnan nga namatyan ang kawani ug way nakapuli. Maong nidangop na lang siya sa Arangkada sa DYAB Abante Pa, Bisaya! gahapon sa buntag.
Nahinabi namo si Mabeth Elias, PhilHealth Social Insurance Assistant, nga niluwat sa mosunod nga katin-awan:
• Covered sa PhilHealth si Mary Ann bisan wa kabayad sa fourth quarter kay kinahanglang atimanon ang mga sakop kon ma-ospital sila sud sa unom ka buwan human sa kataposang bayad;
• Mahimong ulian sa PhilHealth ang nabayad kon magsuwat siya ug mosumiter sa tanang gikinahanglang dokumento;
• Tawgon nilang atensiyon sa Eversley sa wa kinahanglanang paglisudlisod sa pasyente.
* * *
Gitawgan namong Eversley apan gibalibaran nga way mga opisyal nga makatubag sa among mga pangutana. Manghinaot kong makabasa sila ini ug makatubag sa mosunod:
• Nganong bisan accredited sila wa may kasayuran ang mga kawani sa Eversley sa batakang mga lagda sa PhilHealth?;
• Nganong nangita pa man og MDR nga ang ubang tambalanan motuo na mag PhilHealth ID (gani si PhilHealth Director Rissa Hontiveros nipasalig nga ang senior citizens makapakita sa ilang OSCA IDs kon wa pay PhilHealth ID)?; ug
• Nganong wa pa man kahibawong Eversley hangtod karon nga krimen ang pagtanggong sa pasyente tungod sa bayranan?
- Latest
