Kataposang tigbaraw
Karong nanghunaw na ang Movie and Television Review and Classification Board og responsibilidad sa pagbadlong sa pagsibya sa diskurso ni Davao City Mayor Rodrigo Duterte nga puno sa pamalikas, kay ang ilang gahom kutob ra diay sa mga pelikula ug TV shows ug di nang kahikap sa news programs, angay bang mogara si Duterte ug dugangan pang pagpabuhagay sa law-ay niyang mga pung? O may laing ahensiya nga makabadlong niya?
Mahimong si Duterte mismo ang mopugong sa iyang kaugalingon. Kon nadutlan sa mga pagsaway sa iyang pag-apil og balikas ni Pope Francis ug pag-insistir sa naandang sinultihan bisan may makadungog nga mga bata, mahimong magpasumbingay na lang sa mosunod niyang pakigpung.
***
Mahimo sang badlungon siya sa Kapisanan ng mga Brodkaster ng Pilipinas . Nga maoy tinuod nga nag-regulate sa broadcast industry. Gawas kon ganahan ang MTRCB nga mag-apil-apil, labi na kon ang hingtungdan di sama kaisog ni Duterte.
Apan kasagaran ang KBP molihok lang kon dunay ipasaka nga pormal nga reklamo. O kon sibaw nang pagsaway sa publiko, sama sa nahitabong hostage crisis sa Luneta niadtong 2010 nga nisangpot sa pag-usab sa KBP Broadcast Code pagka sunod tuig (palabihong kinabuhi kay sa katungod pagpakisayod atol sa crisis situations). Gawas pa, mapahamtang lang sa KBP ang iyang mga lagda sa mga sibyaanan nga iyang sakop.
***
Mahimo sang ang indibiduwal nga media organizations maoy mobaraw ni Duterte. Mahimong di na mag-live coverage sa iyang mga diskurso o press conference, modangop na lang sa delayed telecast o broadcast aron nga kasapawan og silbato ang tanang balikas ug binastos.
Apan ang kahinam sa iyang mga dumadapig nagsaad og taas nga ratings sa bisan unsang coverage ni Duterte. Wa say sibyaanan nga ganahang mag-una-una og reklamo sa KBP batok sa ubang sibyaanan kay nabalaka nga kapasanginlang nahudlat sa kumpetinsiya. Maong dako ang kahigayonan magtakdo ang panginahanglan ni Duterte sa pagpasiugda og dugang paukyab ug sa pangandoy sa mga sibyaanan sa mas maayo nga ratings.
***
Sama sa naandan, ang labing gamhanan nga makabaraw sa iresponsable nga pagpanibya--kurakot nga komentarista man o bastos nga politiko--mao ang mga konsumidor, ang mga tigtan-aw sa telebisyon ug mga tigpaminaw sa radyo, nga mao say kinabag-an sa mga botante sa piniliay sa Mayo sunod tuig.
Kon, bisan sa kainutil sa KBP ug MTRCB, moinsistir ang katawhan sa pagpatigbabaw sa mga lagda sa kaligdong, mapugos ang mga sibyaanan paghunong sa ilang live coverage sa mga balikas ug ang mga politiko sa pagpabaha sa ilang kinalang-ogan nga mga pung sa kanal. Mapugos sila kay kon dili motidlom ang ratings ug maalkanse ang kita sa mga sibyaanan ug segurong maparot sa piniliay ang himalikas nga mga politiko.
- Latest
