Kapuslanan sa CICC

Di daghan ang nahibawo sa nagpadayon nga pagbansay-bansay sa mga sakop sa kapolisan sud sa kontrobersiyal nga Cebu International Convention Center sa Dakbayan sa Mandaue. Sukwahi sa higanteng tarpaulin nga gimarkahan og "Never Again" nga nihabol sa usa ka bahin sa gubaon nga building, wa magwarawara ang kapolisan sa ilang kalihokan.

Gani, segun sa mga tigpasiugda gipili nila ang CICC kay wa silay laing nahunahunaan nga libreng luna nga kapahigayonan sa 45 ka adlaw nga kurso sa kapolisan sa Metro Cebu ug mga sakop sa Armadong Kusog. Alang hinuon nako haom kaayo ang CICC sa usa sa ilang gitun-an: Unsaon pag-preserbar ang crime scene.

* * *

Labihan kangiob sud sa CICC. Bugtong timaan nga may nagtikaw-tikaw mao ang pipila ka bombilya nga nagsiga sa hallway. Naabtan namo sa usa sa function rooms ang nag-klaseng mga sakop sa Philippine National Police sa mga dakbayan sa Mandaue ug Lapu-Lapu ug military police sa Philippine Air Force.

May pipila ka electric fans nga naglibot nila aron pag-iban sa labihang kaalimuot, salamat sa nag-alintabong El Niño sa gawas ug sa kakuwang og hungawanan sa hangin sa sud. Ang kaigang sa building nga nabantog sa usikang centralized airconditioning system, nga bisan gamayng kuwarto ray abangan ang tibuok building maoy mobugnaw, maoy usa sa simbolo sa masulub-on niyang kahimtang.

* * *

Tinuod nga ang linog ug bagyong Yolanda niadtong 2013 nakatampo sa pagkagusbat sa building. Apan mas tinuod sab nga sa wa ang sunudsunod nga katalagman, depektuso nang daan ang CICC nga matag bunok sa uwan magbanaw gyod ug nga ang mga panday sa Kapitolyo gikatahong way pahuway sa pag-ayum-ayom sa mga daot sa building.

Gawas pa, ang labing dakong kadaot sa CICC mao ang kakuwang niya og kapuslanan. Bisan gipaduma na sa kanhi tagduma sa Kapitolyo ngadto sa pribadong kompaniya, ang Philippine Exhibits and Theme Parks Corporation (PETCO), mas daghang adlaw nga nagmingaw. Maong mas dako ang gasto sa maintenance kay sa kita.

* * *

Way nag-apura sa pagpalit sa CICC gikan sa Kapitolyo kay way ganahang mopuli pagpalukdo sa bug-at uyamot nga palas-unon. Nakamatngon ang Mandaue City Hall ug Department of Trade and Industry nga di kaayo masaaron ang ilang plano paghimo ining exhibit area.

May masaaron hinuong bahin sa CICC. Dakong opisyal sa Ateneo de Cebu nakapaniid nga ang labing maayong pagkahimo sa CICC mao ang lapad niyang parking area. Si Eric Mendoza, kanhi Presidente sa Mandaue Chamber of Commerce and Industry (MCCI) nisugyot nga haom ang CICC nga himuong terminal sa tanang sakyanang pamasahero. Bisan si kanhi Cebu City Mayor Tommy Osmeña nirekomendar, wa hinuon kong kaseguro kon wa ba siya magbugalbugal, nga himuon ang CICC nga world class nga punerarya.