Kaguliyang sa pantalan
Kon natanggong ka sa mga pantalan sa Sugbo ug ubang bahin sa Kabisay-an sa niaging mga adlaw tungod sa kadagko sa bawod nga hinungaw sa bagyong Lando, naa nimo ang hingpit namong simpatiya. Gawas nga nalangay sa mahinungdanon nimong biyahe--pagtrabaho, pag-eskuyla o pag-uli sa imong pamilya--nabiktima pa gyod sa wa kinahanglanang kaguliyang sa mga pantalan.
Wa katabang sa imong kawsa ang makalibog nga pahibawo sa Philippine Coast Guard (PCG) niadtong Lunes sa hapon nga makalarga nang tanang inter island vessels kay ni-arang-arang nang kahimtang sa panahon, nga gisumbalik sa Philippine Atmospheric, Geophysical and Astronomical Services Administration nga wa pa libkasa ang gale warning. Tawgon nakong atensiyon sa tanang hingtungdan sa pait nga kahimtang sa Pier 1 sa Dakbayan sa Sugbo.
***
Sa kadako sa kita sa Cebu Port Authority --gawas nga nabusdik sa dakong bayad sa nagtipun-og nga kargamento ug containers, nangolekta pa gyod og terminal fees sa mga pasahero ug mga sakyanan nga mosud sa pantalan--ug sa dagkong ginansiya sa mga kompaniya sa barko, puwerteng paita sa kahimtang sa mga pasahero:
•Naa sa daplin sa dan ang ticket offices nga ang maglinyang mga pasahero kon di masaghiran sa mga sakyanan segurong mainitan ug mauwanan sa nag-usab-usab nga panahon; ug
•Kon may bagyo, samang Lando, labi na kon di magkasabot ang PCG ug PAGASA, sama niadtong Lunes, maglibog ang mga pasahero kanus-a maukang sa pantalan kay mga guwardiya ray tinubdan sa kasayuran.
***
Gipasigarbo sa CPA nga world class ang ilang passenger terminals--bugnawng aircon, limpiyong pansayan ug libreng wifi--ug nindot nang shuttle buses (hinaot nga bag-o nang mga sakyanan di lang pintal) ug gipasalig sa mga kompaniya sa barko nga padayong gipalambo ang ilang pangalagad sa mga pasahero, apan nganong di mang kapatuman sa mosunod nga batakang kausaban:
•Pagpahimutang sa mas haom nga mga luna sa ticket offices nga di mameligro ang mga pasahero; ug
•Public address system nga kanunayng mopahibawo sa mga pasahero sa storm signal, o gale warning, o kanus-a posibleng makalarga.
***
Nidangop kong Cebu City Mayor Mike Rama. Kinsa nipasalig dayon pagtabang sa mga pasahero nga gipasagdan lang sa CPA ug mga kompaniya sa barko. Nipasidaan siya sa pagbungkag sa ticket offices ug mga tolda nga ilegal nga nagtungtong sa kadalanan ug sidewalks.
Samtang niangkon nga di siya kahilabot sud sa pantalan, nisaad si Rama pagpahibalik sa kahapsay sa kadalanan palibot sa mga pantalan. Masaligon siyang makigtambayayong si CPA General Manager Edmund Tan bisan gilibotan sa mga opisyal nga iyang gihulagway nga mga dunot og pangutok ug bisan sa ilang panag-ilog sa luna nga nahimutangan sa Compania Maritima. Daghang saad si Rama nga wa pa matuman. Hinaot nga di ni masumpay sa listahan.
- Latest
