Rama ikiha na 'sab ni Tommy

Mura'g mag-atubang na usab og laing kaso si Mayor Michael Rama nga ipasaka sa higpit niyang karibal sa politika, si kanhi mayor Tomas R. Osmeña. Kini tungod kay ang City Hall mihatag og P25.1 milyones nga advance payment sa private contractor sa Carbon Public Market Unit II nga na-disqualify tungod kay kuwang og dukomento.

Sa press conference, gitug-an ni Osmeña nga huwaton niya kun unsa'y tubag ni Mayor Rama niining mao nga isyu. Apan sa among panaghinabi ni Mayor Rama, dili niya tubagon ang suwat ni Osmeña kay ang gusto niya nga motubag mao ang hingtungdan nga department head sa City Hall.

Apan pahinumdoman lang nako si Mayor Rama nga anaa ra ba sa Section 5 (a) Republic Act 6713 (Code of Conduct and Ethical Standards for Public Officials and Employees) nga ang mga opisyal ug kawani sa kagamhanan kinahanglan g'yud nga motubag sa mga suwat nga ipadala kanila.

***

Ang survey nga gihimo ngadto sa mga tinun-an sa University of the Philippines (UP) Diliman Campus nagpakita nga mas popular si Mar Roxas sa tanang gusto nga magpapili pagka presidente.

Sa kapin sa dos mil ka tinun-an nga gipangutana kinsa sa mga presidentiables ang ilang gusto, 598 kon 23% ang pabor ni Roxas. Duol ra hinuon si Senador Grace Poe kay mikuha man kini og 572 kon 22%.

Unya si Senador Miriam Defensor-Santiago mikuha og 512 samtang si Davao City Mayor Rodrigo Duterte, 491. Ambot wala man maapil sa lista si Vice President Binay. Basin wala'y mipili.

Mga utokan ang mga tinun-an sa University of the Philippines. Kon imong balansehon pag-ayo, ang mga "high level" nga pumipili, nakasabot g'yud kon kinsa ang angay'ng mahimong presidente sa nasud ug kinsa kadtong dili angay nga botohan tungod sa isyu sa kurapsyon.

Ang nindot nga may survey usab unta alang sa mga kandidato sa pagka bise presidente. Apan kon gamiton lang g'yud nimo ang imong utok, dili man lisud pag-ila kinsa ang angay'ng padag-on pagka bise presidente kay walay dautang binuhatan.

Gusto lang g'yud nako nga ang sunod nato nga presidente ug bise presidente mao ang mga tawo nga walay dautang rekord sa pagpangawkaw sa salapi sa kagamhanan ug aktibo sa kampanya sa graft and corruption.

Ang gikuyawan lang nako kon manggawas na ang kuwarta kon magkaduol na ang eleksyon ug ang mga botante, ilabi na kadtong wala magsunod sa isyu, madala ug botohan nila ang mga tawo nga walay maayo nga programa sa nasud.

Dinhi bitaw sa Sugbo, nahibulong ko kay adunay mga tawo nga kusog kaayo mangangkon nga sila supak gayud sa kurapsyon apan ngano kaha nga lunod-patay man sila nga misuporta sa tawo nga nabulit sa pasangil kabahin sa pagpangilkil?

Awhag diay nako sa mga mokandidato ug sa ilang mga dumadapig, ayaw g'yud usa mo pagpakatap og election propaganda materials kon wala pa magsugod ang kampanya kay maisip mo niana nga abusado.

***

Daghan g'yud ang malipay kay natuman ang ilang gipangandoy nga molansar pagka senador si Atty. Levito Baligod. Giisip man gud nga kini si Atty. Baligod maoy "guardian of people's money" kay kontra kaayo niya ang kurapsyon.

Siya maoy mipasaka og kaso nga nakapapriso g'yud ni Janet Lim-Napoles ug sa pipila ka senador nga giingong nalambigit sa minilyon ka pesos nga kurapsyon sa ilang Priority Development Assistance Fund.

Nabasa nako sa Facebook ni Baligod nga gi-share sa mga tawo nga kontra og kurapsyon nga si Baligod miingon "I can do more if I'm in the senate. I have seen depth and breath of corruption in our country. We have to fight corruption because it robs us of a better country."

Ang problema lang kay daghan ang wala makaila ni Atty. Baligod ug sa iyang kawsa pakigbatok sa kurapsyon. Kon makadaog si Atty. Baligod, sigurado ko nga siya ang mangusog aron mapabilanggo si Vice President Jejomar Binay.