Sha-e ni Magellan
Hagbay ra kong nagdumot nga mokaon og sha-e. Apan wa gyod makasuway hangtod karon (mahimo hinuong nakakaon na sa una apan wa na lang mahinumdom). Tingali tungod kay wa koy kailang nanghagad o nagsige og galgal. Nakakaon na kog asadong sawa ug adobong buaya. Nakainom na sab og init kaayong bino sa apdo sa bitin. Apan nagsige gihapon og handom nga makatarung nag kaon og sha-e.
Maong labihang hinangopa nako dihang nakaagi gahapon sayong buntag og kan-anan daplin sa highway sa Mandaue City nga may sha-e. Wa kong kaila. Apan dihang akong nasimhotan nagduda ko. Giingnan ko sa batan-ong tindero nga mao to ang kinakusgan nilang sha-e.
***
Di hinuon sha-e ang kinaham sa ilang mga kustomer. Segun sa tindero ang ilang adobo nga tag-P25 ang hiwa maoy labing himalitan, sunod ang tinowang isda (P25 sang hiwa) ug ikatulo ug labing mahal ang balbacua (P40 ang hiwa). Kasagarang mangaon makahurot og upat ngadto sa lima ka gagmayng puso (P3 ang buok). Di kaabot og P50 ang mabayran.
Nagplano unta kong magpakisayod unsang bahina sa baboy ang sha-e (may nagsulti nako nga tungol, may nag-ingon sang ilogon), giunsa paglimpiyo ug pagluto ug nganong di man gyod mawa ang baho. Apan pagkahibawo nako sa ngan sa tindero, gihangyo nako siyang interbyuhon sa video ug nakalimtan ang orihinal nga katuyoan.
***
Siya si Magellan Omandac, taga Marigondon, Lapulapu City. Siya rang usa ang nagtikaw-tikaw sa bag-o pang nangabli nga kan-anan. Luto nang sha-e, atay ug adobo ug nag-andar na sang electric fan nga plastik ang palabad aron makabugaw sa langaw. Andam nang sug-angan apan wa pay gipatong nga dagkong kawa sa balbacua ug tinowa.
Nadani ang akong pagtagad sa kayano niyang manulti ug sa pagpaundayon niya og tubag sa akong mga pangutana atubangan sa kamera sa akong telepono. Human sa interview, nagpahiyom kong naglakaw kay nakasaksi og makugihong panlimbasog bisan sa kalinghod. Nakatag-an ka, nakalimot ko sa sha-e.
***
Gi-post nako ang video sa Facebook aron pakisaw-an ang kagaan nga akong nabatyagan human nakigsulti ni Magellan. Natandog ang unang mga nakakita kay nahinumdom sa ilang kakabos ug kabatan-on ug pakigbisog sa mas maayong ugma. Ang uban nadani sa iyang ngan. May nangutana pa gani nakatowa na bag Lapulapu.
May nakaila niyang silingan sa Marigondon. Nikomentaryo ang iyang employer. Kinsa niingon nga si Magellan tinuod nga kasaligan. Tungod sa iyang tag, akong nahibaw-an nga may FB account sab si Magellan. Hulyo pa ning tuiga ang kataposan niyang post sa hulagway uban sa suod niyang mga higala. Way hisgot sa sha-e. Human sa pila ka oras, nalabyan nakog balik ang kan-anan nga may mga kustomer na. Maayo pa sila nakakaon na tingali og sha-e.
- Latest
