Paghusay sa 93-1
Masaligon si Cebu City Mayor Mike Rama nga mahusay nang kontrobersiya sa 51 ka ektarya nga luna sa 11 ka barangay sa Dakbayan sa Sugbo ubos sa Provincial Ordinance 93-1 sa di pa matapos kining tuiga. Matod niya may kauyonan nang nakab-ot ang City Hall ug Kapitolyo atol sa panagtagbo nilang Gobernador Junjun Davide niadtong Biyernes sa City Sports Club sa Ayala Center Cebu.
Nipasabot si Rama sa DYAB Radyo Patrol nga nakab-ot ang kauyonan tungod sa talagsaong kasuod ug pagsinabtanay nilang Davide dihang nagkauban sila sa City Council. Nasementong ilang relasyon dihang nasakit si kanhi Mayor Tommy Osmeña ug si Rama nahimong acting mayor ug si Davide acting vice mayor.
* * *
Ganahan na unta si Rama nga mohatag og pasiunang mga detalye. Apan nagkasabot silang Davide nga way luwatan nga bisan unsang pamahayag samtang gihapsay pang mga detalye sa kauyonan sa gitukod nilang technical working group.
Nanghinaot si Rama nga wa nay manglawgaw sa naumol nilang lab-as nga kauyonan. Matod niya malampuson niyang nakumbinser si Davide nga labaw sa pangintriga sa politika ang pagpanalipod sa kasaysayan sa mga luna ug sa mga molupyo ug pagpalabi sa interes sa katawhan kay sa pag-iyahay og kuwenta sa labing makiangayon nga bili sa nahibiling 32 ka ektarya nga luna nga wa pa kabayri.
* * *
Mas abunda ang mga detalye nga gipagawas ni Bise Gobernador Agnes Magpale kinsa nakatambong sab sa tigom:
• Nakumbinser nila ang City Hall pagpausbaw sa orihinal nilang gitanyag nga P500 milyones nga bayad sa mga luna sa 93-1;
• Mas maayo ang bag-ong memorandum of agreement kay gitabangan og umol sa City Hall ug Kapitolyo, lahi sa MOA nga unang gisumiter ni Rama nga hinimo lang sa City Hall; ug
• Gawas sa mga molupyo sa 11 ka barangay sa Dakbayan sa Sugbo, gipatigbabaw sab atol sa tigom ang interes sa ubang mga molupyo sa Lalawigan sa Sugbo nga maapektahan sa bisan unsang kauyonan sa 93-1.
* * *
Matod ni Rama mas dako ang kahigayonan nga mapatuman ang kauyonan nilang Davide kay sa nahaunang kauyonan sa 93-1 tali nilang Osmeña ug kanhi gobernador Gwen Garcia. Kay ning higayona, apil na sa sabutsabot pa lang silang Bise Mayor Edgar Labella ug Magpale nga maoy mga tagduma sa lokal nga mga bay balaoranan.
Subling gipanghimakak ni Rama nga iyang gibabagan ang kauyonan pagbaylo sa mga luna sa 93-1 sa duha ka ektaryang Block 27 sa North Reclamation Area. Matod ni Rama bisan si Garcia nakugang nga nisud si Osmeña og kauyonan uban sa Kapitolyo sa way pagkonsulta nilang Rama ug sa City Council. Sa iyang bahin, si Osmeña nisumbalik nga ang pagsabotahe ni Rama sa kauyonan maoy pabilo sa away nilang Garcia.
- Latest
