Hagit ni Leni
Giangkon ni Kongresista Leni Robredo nga nakabatyag siya sa panginahanglan sa pagpakita sa mas daghang katawhan pinaagi sa pagduaw sa mas daghang dapit aron pagsusi sa iyang kahigayonan pagdaog sa nasudnong katungdanan. Bukas siya sa nahaunang awhag nga mag-senador. Bisan mas ganahang magpapili pag-usab pagka kongresista sa ikatulong distrito sa Camarines Sur.
Nabugnaw hinuon si Robredo pagkakita sa resulta sa labing uwahing surveys nga katunga ra sa mga Pilipinhon ang nakaila niya. Giingnan siya nga di ni paigo pagdaog og nasudnong piniliay. Usa ni sa mga hinungdan nganong kumbinsido siya nga ahat ra’ng mga awhag nga padaganon siya pagka bise presidente ni kanhi DILG Secretary Mar Roxas.
***
Gipasabot si Robredo sa mga nag-una sa politika nga wa kaila ang katawhan niya tungod sa iyang kahilumon ug sa pagtingob sa panahon pag-atiman sa iyang distrito. Gitambagan siya nga mangita og kahigayonan pagpakita sa ubang bahin sa nasud.
Maong iyang gidawat ang mga imbitasyon pagduaw sa mga dapit gawas sa iyang distrito. Labi na kun ang kalihokan nga iyang tambongan may kalambigitan sa namatay niyang bana, si anhing DILG Secretary Jesse Robredo. Maong sa niaging duha ka sunudsunod nga semana niduaw si Robredo sa amihanang lungsod sa Consolacion, nga giduaw sa iyang bana pila ka oras sa wa pa mohagsa ang gisakyang ayroplano sa kadagatan sa Masbate.
***
Apan gibuyag si Robredo sa iyang mga suod nga nag-usik-usik lang sa iyang mga biyahe. Giingnan siya nga suok ang Consolacion ug gamay rang makakita niya sa tambongan nga kalihokan, ang inugurasyon sa bag-ong munisipyo sa niaging semana ug paghingan sa Camp Jesse M. Robredo karong semanaha.
Giawhag siya sa pagpuno og dugang kalihokan ug pakighimamat sa mas daghang katawhan sa iyang mga biyahe. Nagkatawa siyang nikumpisal nga wa siyay kalibotan unsaon pagpuno sa iyang kalihokan. Gawas pa, di pamolitika ang orihinal nga tuyo sa iyang mga biyahe. Karong pormal nang gitanyagan ni Roxas, duha ka adlaw human nipahibawong mag-presidente si Senador Grace Poe, kinahanglang apurahon ni Robredo ang iyang hukom.
***
Gibalibaran ni Robredo ang pasiunang mga awhag nga tungod sa:
•Kakuwang niya og kuwarta ug makinarya paglusad og nasudnong kampanya;
•Kusganong pagsupak sa tulo niya ka anak; ug labing mahinungdanon,
•Layo ra sa pitik sa iyang kasingkasing ang pagdagan pagka bise presidente karon ug nabalaka siyang di hingpit nga maningkamot ug di makatabang sa administrasyon kay mapugos lang sa pagpangampanya.
Nanghinaot si Robredo nga makakita ang administrasyon og laing running mate. Nanghinaot sab si Presidente Noynoy Aquino nga, human sa kamatayon sa iyang bana, di na kinahanglang pahimuon si Robredo og dugang sakripisyo. Karong nagpakitabang na si Roxas, di nang katago si Robredo sa kalit ug talagsaong kahigayonan paghimo og kasaysayan.
- Latest
