Margot manggiluy-on kaayo

Maisip si Konsehal Margarita "Margot" Osmeña nga bayani alang sa maestro nga nadam-agan sa sakyanan sa Cebu City Hall didto sa Barangay Banilad kaniadtong Biyernes sa gabii.

Si John Rey Sanchez, maestro sa Banilad Elementary School, kinahanglan og dinalian nga operasyon sulod sa mga usa ka oras human kini dad-a didto sa Chong Hua Hospital.

Apan ang ospital nanginahanglan og labing menus P30 mil nga downpayment aron mapahigayon ang operation. Ang mga kaubang magtutudlo ni Sanchez nakatigum lang og mga P5,000.

Suwerte nga si Konsehal Osmeña miabot human siya gipahibawo ni Konsehal Lea Japson sa mao nga hitabo. Wala'y cash money si Margot atol sa mao nga higayon mao nga tungod sa kalooy, gigamit sa konsehal ang iyang credit card aron ibayad sa downpayment sa ospital.

Tuod, naoperahan g'yud ang maestro. Gituki nako kini nga punto tungod kay gusto nako nga pasalamatan si Konsehal Margot sa iyang pagka maluluy-on.

Tagsa ra'y mga opisyal sa kagamhanan nga aduna'y susama nga batasan. Tiaw mo, P30 mil unya wala siya maghuna-huna nga mabayran siya sa mao nga kantidad.

Aw, hinuon, dato si Margot ug ang iyang bana nga si Kanhi Mayor Tomas R. Osmeña apan daghang mga kuwartahan nga dili sama kaniya og batasan nga matinabangon.

Unta, ang batasan ni Konsehal Margot manakod ngadto sa ubang mga adunahan. Tingali, kun kuwartahan pa usab ko, susama usab unta ko ni Margot nga matinabangon.

Aw, suheto niini ang akong mga trabahador sa matag higayon nga aduna ko'y ipatrabaho sa akong balay.

 * * *      

Tan-aw nako, klaro na ang upat ka kandidato pagka presidente nga magpapili sa eleksyon karong sunod tuig.

Giapil na lang nako pag-ihap si Davao City Mayor Rodrigo Duterte kay klaro man kaayo nga bisan og moingon kini nga dili modagan, sige og bisita sa lainlaing lugar sa nasud.

Dayon si Grace Poe, nasayran nako nga kunpirmado na nga kini modagan sa pagka presidente uban sa iyang ka tandem nga si Senador Chiz Escudero.

Ang mga suod ni Escudero nasayod nga mas makamao pa si Chiz kay ni Grace Poe, apan mao lagi, mas popular kuno si Poe. Pastilan, abi kay popular maoy himoong presidente?

Ang laing duha, nahibaw-an na man nga sila si Vice President Jejomar Binay ug si kanhi DILG Secretary Mar Roxas. Pagka karon, kanilang upat, para nako si Mar maoy mas maayo.

Si Grace Poe tuod kusog sa survey apan kuwang pa og kasinatian sa pagdumala sa kagamhanan. Duha pa lang ka tuig siya nga nahimo nga senador ug walay kasinatian sa executive functions.

Mosakay ka ba og sakyanan nga ang drayber dili makamao mo-drive? Sigurado g'yud ta nga maaksidente. Unya si Duterte, daghan 'sab ang gikuyawan kay basin kuno og daghan ang human rights violations.

Unya, para kanako si Binay dili na maayong hisgotan pa tungod sa daghan kaayo nga pasangil sa anomaliya nga iyang giatubang unya wala gayud niya tubaga.

Kun adunay mga sakop sa media nga gusto'ng makighinabi kaniya, mamili siya ug estasyon. Ambot, tinuod ba nga nag-una na daan ang questionainares sa wala pa siya moabot.

Si Mar Roxas wala pa g'yud anomaliya unya suheto siya sa legislative ug executive functions kay nahimong senador sa dugay'ng panahon og secretary sa DOTC, DTI ug DILG.

Apan ang daku g'yud niya nga nahimo mao ang pagpasulod sa mga call centers nga daghan ang nakatrabaho og dagko pa kaayo ang suweldo ug ang balaod niya nga nakapabarato sa presyo sa mga maintenance drugs.

Apil ko nga nakapahimulos sa Cheaper Medicine Law. Kun wala pa si Mar Rocas, naut-ot na tingali ko pagpalit sa akong mga tambal. Mao kana nga sa upat nga milutaw karon nga may plano nga magpresidente, makaingon ko nga si Roxas ang angayan.