Wa sila magkaabot
Pulos sila nagdumili pagpahamtang og deadline apan managsama silang kanhi Interior Secretary Mar Roxas ug Senador Grace Poe nga nitakda sa buwan sa Septiyembre nga maoy tukmang panahon sa pagpakanaog sa ilang hukom:
• Si Poe niingon nga modeklarar na siya sa di pa matapos sunod buwan kon modagan ba pagka presidente, o bise presidente, o motiwas sa iyang unang termino sa Senado; ug
• Si Roxas nagpaabot nga makahukom na si Poe sunod buwan modawat ba sa iyang tanyag nga mamahimo niyang running mate, aron nga kon mobalibad may igo pa siyang panahon sa pagpangita og laing kapares sa piniliayng presidensiyal sa Mayo 9, 2016.
***
Kaingon gyod nako nga mag-abot silang Roxas ug Poe sa Arangkada sa DYAB Abante Pa, Bisaya! gahapon sa buntag. Nisaad si Poe sa pagduaw sa sibyaanan sa pagsugod gyod sa Arangkada sa alas-6 sa buntag. Samtang nipahibawo si Roxas nga magdungan silang Budget Secretary Butch Abad paghapit sa alas-7:15 sa buntag.
Dihang wa moabot si Poe pasado alas-6 na, gipalihug nako si June Perez, tagduma sa DYAB News Department, nga tawgang pundok sa senadora nga kon malangay pa posibleng mag-abot silang Roxas ug pananghiran ang duha ka kampo mahimo ba silang dunganon sa pakighinabi. Nakaseguro kong ganahan ang mga tigpaminaw. Apan wa kaseguro kon di bakikawan ang duha.
***
Nipasabot ang mga kampo nilang Poe ug Roxas nga pulos nalangay ang iyang ayroplano. Nihangyo si Roxas nga kay natanggong pa man sa Ninoy Aquino International Airport mahimo bang magpa-interview pinaagi sa telepono. Nipahibawo sab si Poe nga pasado alas-7 na moabot sa sibyaanan.
Tuod man, nanawag si Roxas pagkataud-taod. Samtang gihinabi nako sa telepono, niabot si Abad. Nga nakugang pag-ayo nga wa pa makabiya si Roxas sa kaulohan. Gipananghiran nakong daan si Abad nga mahimong dungan nako siyang mahinabi uban ni Poe. Nitanyag si Abad nga mopadaplin na lang kay niangkon nga mas interesado ang mga Sugbuanon sa mga ipanulti ni Poe.
***
Apan igo gyong nahuman pakighinabi ni Abad, ambot naminaw ba sa iyang sakyanan, mao say pag-abot ni Poe. Nag-abot sila gawas sa announcer's booth. Gikomedyahan ni Poe si Abad nga hago nang tan-awon bisan wa pa magsugod ang kampanya.
Bisan sa kadaghang nagpaabot sa iyang hukom ug bisan sa mas daghang pagsaway, kalma ug mapahiyumon si Poe nga nanubag sa among mga pangutana. Akong paniid? Desidido na si Poe nga modagan pagka presidente. Apan may gamay pang kahigayonan nga dawaton ang tanyag ni Roxas. Gibalikbalik ni Poe nga bilib siyang Presidente Aquino apan wa modayeg bisan kausa ni Roxas. Sa iyang bahin, si Roxas nitataw nga bisan angayng maghuwat kay siyay nangimbitar di siya makapaabot ni Poe hangtod sa hangtod.
- Latest
