Pagtabok ni Delos Santos

Nangayo og pasaylo si Cebu City Mayor Mike Rama ni Konsehal Mary Ann Delos Santos. Bisan wa siya moangkon nga gilabay og lapok sa iyang kaubanan sa Team Rama ang kanhi nila kauban. Matod ni Rama bisan wa siya mahibawo unsay gisakitan ni Delos Santos ug sa iyang pamilya, mangayo siya og pasaylo sa bisan unsang di maayong gipanulti sa iyang mga dumadapig.

Sa telepono ra ming nagkasulti si Mayor Rama sa Arangkada sa DYAB Abante Pa, Bisaya! Wa kong kahibawo nanghunaw ba samtang niinsistir nga way labot sa kampanya batok ni Delos Santos. O namikat ba samtang nitataw nga nagpabiling numero uno si Delos Santos sa iyang listahan sa mga kandidato sa amihanang distrito.

***

Ambot makapugong bang pagpangayo og pasaylo ni Rama sa hagbay rang gihugun-hugon nga pagbalhin ni Delos Santos ngadto sa Bando Osmeña Pundok Kauswagan. Ambot unsa kamatinud-anon si Rama sa pagpugong niya. Ambot tinuod bang nabalaka nga mokuyog og tapon sa pikas ang baga nga mga botante sa Lahug.

Bisan sa tanang hapuhap ni Rama, wa papugong si Delos Santos sa pagbiya sa Team Rama. Kay gawas sa mga alam-alam ni Rama pinaagi sa media, pulos man santako ang nahiagoman ni Delos Santos gikan niya--gikan sa pagpalagpot niya sa subasta sa Cebu City Medical Center ngadto sa paghulga nga ikiha uban sa mga konsehal sa BO-PK nga nipalangay sa pagbaligya sa South Road Properties.

***

Apan way arang ni Rama. Human nakumbinser ang higanteng mga negosyante sa paghinayon pagbayad sa 45.2 ka ektarya nga luna sa SRP, bisan sa pasidaan sa Department of Interior and Local Government nga mahimong ilegal ang transaksiyon, unsa pa man ang di niya mahimo?

Bisan ang iyang politikanhong mga kaatbang bilib sa kakugi ug  determinasyon ni Rama sa pagdani og mga dumadapig. Lahi ni kanhi Mayor Tommy Osmeña, gihulagway si Rama nga di dali nga mangluod ug di dayon motahan.

***

Bisan sa higpit nilang panag-atbang sa nangaging mga piniliay, bilib ni Delos Santos ang dagkong mga haligi sa BO-PK. Matod nila ang talagsaong liderato ni Delos Santos sa Lahug, nga nisangpot sa pagtubag sa tanang batakang mga panginahanglan sa mga molupyo, gisuklian sa mga botante og hingpit nga pagpaluyo.

Matod ni Osmeña wa siya mag-apura. Nipaundayon siya sa nagpadayong proseso sa pagpangonsulta ni Delos Santos sa nagkalainlaing hut-ong sa Lahug labot sa iyang politikanhong mga lakang. Sa wa pa mobiya, gipahinumdoman ni Delos Santos ang iyang kaubanan sa Team Rama nga siya ang orihinal nga oposisyon sa dakbayan. Kon mahinayon pagtabok sa BO-PK, kapamatud-an ni Delos Santos nga di siya mahadlok pag-umol sa independente niyang baruganan. Bisan kinsa pay nagtungkawo sa City Hall.

[email protected]