Daghan ang masuko ani

Klaro na g'yud kaayo nga gigukod sa Cebu City Hall ang tagdumala sa Farmer's Market sa SRP Access Road diha sa Mambaling.

Gipangbutangan na g'yud sa City Transportation Office og traffic signage nga nagdili sa pag-park sa mga sakyanan daplin sa karsada atubangan sa Farmer's Market.

Ang tumong niini aron nga ang mga tag-iya og sakyanan nga mamalit unta og mga baligya'ng prutas ug utanon sa Farmer's Market dili na maka-parking sa karsada atubangan sa mao nga tabo.

Kun ako maoy Mayor Michael Rama dili nako kini himoon kay maklaro man gud nga gigukod sa dakbayan ang Farmer's Market tungod kay ang nagpasiugda niini mao man ang iyang kontra sa politika nga si kanhi kongresista Tomas R. Osmeña.

Lapad baya kaayo ang karsada diha sa SRP access road sa Mambaling og bisan pa og parkingan ang daplin sa karsada dili makabalda sa pag-agi sa mga sakyanan.

Ang resulta hinoon niini, daghan ang mangasuko ug nahibalo na kita kun unsa ang mahitabo. Pinaagi gud sa pagbutang og Farmer's Market diha, makapahimulos ang katawhan sa barato nga presyo sa baligya.

Labaw sa tanan, ang mga mag-uuma mahalinan sa ilang mga abot sa kaumahan.

***

Kun basahon nimo ang mga balita unya imong sabton pag-ayo ang isyu, mahakatawa ka. Ang kampo ni Vice President Jejomar Binay miingon nga dili kuno makahatag og kaayohan kang DILG Secretary Mar Roxas ang pagtuboy ni Presidente Aquino kaniya.

Apan ngano man lagi nga nagsige man og hangyo kaniadto si Binay nga siya ang ituboy ni PNoy? Abi ba kay dili siya ang gipili ni Presidente Aquino nga paluyohan sa umaabot nga eleksyon, moingon na siya nga wa'y epek ang endorsement?

Ang nindot g'yud para ni Binay mao nga tubagon na niya, punto por punto, ang mga isyu kabahin sa kurapsyon nga gipasangil batok kaniya kay kun magpadayon siya nga magpakahilom lang niini, pilde g'yud siya sa umaabot nga eleksyon.

Sa mga programa sa radyo, ang mga tawo nga mopadangat sa ilang sentimento ug bisan na ang mga ordinaryo nga sibilyan nga imong pangutan-on, moingon g'yud nga dili sila mobotar og kandidato pagka presidente nga nabulit sa pasangil sa kurapsyon.

Dinhi sa Sugbo, bisan ang mga dumadapig sa Team Rama, mitataw g'yud kanako nga ilang gisultihan si Mayor Rama nga dili sila mosuporta ni Binay.

Nahibulong lang ko ni Mayor Rama kay bisan og nabulit na sa mga pasangil si Binay apan padayon siya nga misuporta. Ngano nga ang tawo nga adunay pasangil sa kurapsyon mao may atong botohan?

Ako pa ni Binay dili na lang siya modayon sa paglansar pagka presidente kay sigurado nga mapilde siya. Ang iyang higpit nga makontra mao man si Mar Roxas.

Ang nakabentaha ni Roxas kay ni Binay kay ang DILG Secretary walay bisan usa ka report nga nalambigit siya og kurapsyon. Unya, naa pa ang ubang posible nga molansar pagka presidente nga si Senador Grace Poe, apan ang nakaapan kay wala pay "experience" pagdumala sa nasud.

***

Bag-o na sugod kagahapon ang uniporme sa mga traffic enforcers dinhi sa dakbayan. Para kanako, walay problema kun usab-usabon nila ang uniporme apan duna lang ko'y pangutana.

Mag-unsa man ang ilang bag-o nga uniporme apan dili gani makamao mobadlong sa mga drayber nga nagpaugat sa mga eskena ug nakabalda sa pag-agi sa ubang sakyanan nga anaa sa ilang likud?

Morespeto kaha ang mga drayber ngadto sa mga traffic enforcer abi kay bag-o ang ilang uniporme apan mao gihapon sila nga mga enforcer nga kusog kaayo nga mangilkil kanila?

Adunay mga traffic enforcers nga mura lang og mga "pahoy" kon mga tawo-tawo sa humayan nga magbarog lang sa karsada ug gitan-aw lang ang mga badlongong drayber.

Ang mga traffic enforcer nga ingon niini dili gayud karespetohan bisan og kapila pa sila mag-ilis-ilis og mga uniporme.