SONA ni Binay
Gipaabot nga mohimo sa iyang kaugalingon nga State of the Nation Address si Bise Presidente Jejomar Binay sa Cavite karong hapon. Gikatakdang labhan niya sa mga pagsaway ang pamunoan ni Presidente Noynoy Aquino. Mahimo ang diskurso ni Binay takdo nga usa ka semana human sa SONA ni Aquino ug tulo ka adlaw human ituboy ni Aquino si Interior Secretary Mar Roxas isip opisyal nga kandidato pagka presidente sa administrasyon.
Gipasalig sa kampo ni Binay nga lahi sa mga pagsaway nga giluwatan sa bise presidente atol sa paglusad sa United Nationalist Alliance isip partido sa niaging buwan ipakita nila ang mga numero ug mga dokumento sa kapakyas sa pamunoang Aquino pagtubag sa batakang mga panginahanglan sa katawhan.
***
Kon igo lang tubagon ni Binay ang pasumbingay nga mga pagsaway ni Aquino niya atol sa SONA niadtong Hulyo 27, mora ra siya og nag-press conference pagpanalipod sa iyang kaugalingon. Gitataw sa mga eksperto nga aron mahimong ligdong ang kalihokan ni Binay angay siyang mohatag sab og malukpanon nga pagsuhid sa tinuod nga kahimtang sa nasud.
Naabtan og usa ka semana ang pangandam ni Binay, hinaot pa unta nga di pulos slogans ang atong mabatian karong hapon. Kon undanon ang iyang ipanulti katabangan ang katawhan pagsuhid sa kamatuoran pinaagi sa laing hubad sa mga panghitabo sa niaging lima ka tuig.
***
Unsaon man pagtubag ni Binay ang pangangkon ni Aquino nga malampuson ang kampanya batok sa pangurakot? Gikuwestiyon nang daan ni Binay ang kaagresibo sa administrasyon pagsusi ug pagpasaka og mga kasong pagpangawkaw batok niya ug sa mga sakop sa iyang pamilya, kuwestiyunon ba sab pag-apil ni Binay ang pagka-priso sa tulo ka senador nga silang Juan Ponce Enrile, Jinggoy Estrada ug Bong Revilla?
Kon iya ning himuon, mas maglisod si Binay pagpanalipod sa iyang kaugalingon batok sa mga pasangil sa pangurakot. Kay gilumbay ang iyang kaugalingon sa mga politiko kansang pagkabilanggo gihangop sa kinabag-an sa katawhan.
***
Angay sang atngan sublion bang Binay ang iyang pagpanalipod ni kanhi presidente Gloria Macapagal-Arroyo. Nga sa makausa pa gisantako na sang Aquino sa pagsugod pa lang sa ika-unom ug kataposan niyang SONA. Gikuwestiyon nang daan ni Binay ang pagkapriso ni Arroyo. Gisuklian ni Arroyo ang simpatiya pinaagi sa pagdeklarar sa iyang pagpaluyo sa kandidatura ni Binay.
Hingpit bang paundayonan ni Binay ang iyang paghikalimot sa kasaysayan? Gikopya na niyang pagpanghawod ug pangabuso sa diktadurang Marcos nga hingpit niyang gibatokan sa una, karon hingpit na sang gakson si Arroyo nga nanghasi sa iyang pamunoan sa siya pa ang mayor sa Makati? Kon di magbantay si Binay, ang SONA nga gipanghinaot nga makahatag og kabaskog sa naapiking kandidatura kuyaw nga mahimo hinuong lansang sa lungon sa iyang politikanhong ambisyon.
- Latest
