Naunsa gud tawon ni’ng Sun

Nakasuway ba kamo nga ang simpack sa inyong cellphone mokalit lang og “kamatay” nga dili na magamit?

Mao kini ang akong nasinati diha nga ang simpack nako sa Sun Cellular kalit lang nga dili na magamit kaniadto’ng Domingo ug hangtud na karon. Sa sinugdanan, nagtuo ko nga guba ang akong cellphone o kaha naguba ang network sa Sun kay wala may signal.

Apan diha nga gikuha nako ang simpack ug gigamitan og lain sa mao gihapon nga cellphone, mi-function man. Ang simpack sa Sun gibalhin nako sa laing cellphone, wala gayud mo-function.

Naunsa man kaha ang Sun? Gibinuangan man ko. Ang naanug’nan nako kay duna pa kadto’y 5,700 free text to other networks ang akong simpack kay kanunay man ko nga mi-avail sa ilang promo.

Mao kaha kini ang resulta niana’ng gipamaligya nila nga simpack diha sa aseras? Sa ato pa may kinutoban diay ang “kinabuhi” niini’ng mao nga mga simpack? Kun mao man gani kini ang sitwasyon, maayo pa’g dili kini pamaliton.

Nakahinumdom man gud ko nga kadto’ng akong simpack nga 0933-570-0853 diha nako gipalit sa mga namaligya sa aseras. Anugon kaayo ang kapin pa sa singko mil ka “text to other networks” nga nahisama lang sa gikawat sa akong atubangan.

Awhagon nako ang mga opisyal sa Sun Cellular kun unsaon nila pagsulbad kini’ng mao nako nga problema. Duna pa ko’y mga kontak didto nga nahisama lang sa usa ka butang nga nahulog sa linaw, dayon’g katunaw.

***

Hangtud karon, wala pa gayud pangdakpa sa mga CITOM enforcers kini’ng mga motorista kang kansang mga sakyanan anha iparada daplin sa karsada (D. Jakosalem) gikan sa eskena P. del Rosario paingon sa dalan Ramos.

Daghang mga traffic enforcers nga magpatrolya ug moagi diha, ingon sa mga buta nga wala makakita sa mao nga pag-abuso sa mga tag-iya niini’ng maong mga sakyanan. Maghuwat pa tingali sila nga si Mayor Mike Rama pa maoy momando kanila usa sila molihok.

Ambot og nakakita ba ‘sab kaha si Mayor Rama niini’ng mao nga talan-awon diha’ng dapita nga ang “left side” sa karsada gihimo’ng grahean sa mga sakyanan. Kun nakakita man gani si Mayor Rama niini, basin og wala ‘sab siya masayod nga dakponon kini.

Sa D. Jakosalem lang gihapon, unahan og gamay sa eskena R. R. Landon, adunay kan-anan diha nga sagad mo-parking mga taxi nga ang drayber mokaon. Wala gihapon kini tagda sa mga traffic enforcers nga unta ang ilang opisina naa ra man mahimutang sa Ramos market.

Unya, D. Jakosalem lang gihapon, adunay vulcanizing shop diha nga nag-atbang og ang mga sakyanan anha mag-park nga makahasol g’yud sa moagi, ilabi na nga “two-way” na ang mao nga karsada.

Sa D. Jakosalem lang gihapon duol sa Sacred Heart Church, adunay tindahan nga nagbutang og lamesa nga kan-anan nga anaa sa aseras ug may mag-park ‘sab nga mga sakyanan panahon sa hapon ug gabii.

Pagkadaghan g’yud tawon sa mga dakponon ug angay’ng aksyonan sa traffic enforcers. Gipahibalo na nako ni CITOM operations chief Joy Tumulak apan wala gihapon matagad.

Ang pag-park gud sa “left side” sa karsada, dili g’yud tukma kun ang karsada gideklarar nga one-way. Apan bisan pa og two-way ang karsada apan kun adunay moparking makapahasol sa mga moagi nga motorista, dili gihapon maayo.

Siyaro na man ‘sab og ang mga utok niini’ng mga sakop traffic enforcers wala gayud makahuna-huna niini? Sukad niadto’ng miagi’ng semana, grabe ka traffic ang D. Jakosalem  kay ang karsada atubangan sa Sacred Heart Church gipaparkingan og sakyanan ang duha g’yud ka daplin.

Unya, gamay gud na ang mao’ng bahin sa karsada diha’ng dapita. Makapanglingo-lingo g’yud ko nga maghuna-huna sa pangisip niini’ng mga tawo nga mitugot nga maka-parking ang mao nga sakyanan diha’ng dapita.

Ambot, asa na kaha ang slogan ni Mayor Rama nga tul-iron ang hiwi? Kay mobasa man g’yud si Mayor Rama niini’ng akong lindog, hangyuon nako ka mayor nga mandoi na ang mga traffic enforcers nga lihukon nila kun unsay tukma.

Kun wala sila masayod sa tukma nga gimbuhaton, taktaka sa trabaho.