Lalis sa mapa sa Mamasapano
Naduhig sa wa pa mahuman nga lalis sa kapakyas pagtabang sa militar sa naapiki nga mga sakop sa Special Action Force sa Mamasapano, Maguindanao ang Google Maps. Nga maoy gigamit ni Direktor Getulio Napeñas, ang girelibohang hepe sa SAF, pagtultol sa nahimutangan sa iyang mga sakop nga gitabangan sa labing menos tulo ka pundok sa armadong mga tawo.
Matod sa militar wa motakdo sa ilang opisyal nga mapa ang Google Maps nga giduso nilang Napeñas ug sa mga Amerikanhon nga naniid sa pagduma sa operasyon gikan sa command post sa silingang lungsod sa Sharif Aguak. Kon gituman pa nilang coordinates ni Napeñas, nitataw ang mga sundawo nga mas daghan untang mangamatay nga SAF commandos.
***
Nag-usab-usab hinuon ang mga linya sa militar sa lalis mahitungod sa mapa. Dihang unang natuki sa imbestigasyon sa Senado, si Major General Edmundo Pangilinan, hepe sa 6th Infantry Division sa Philippine Army, nipasangil nga kuwang ang coordinates nga gihatag ni Napeñas. Gitulisok pa gani niya si Napeñas nga wa magdali sa pagpangayo og tabang ug nga di pa gani para niya (Pangilinan) text message ni Napeñas.
Apan nisumbalik si Napeñas nga kumpleto ang coordinates nga iyang gihatag. Ug nga alas-6:18 pa sa buntag, mao pay pagsugod sa pinusilay, niya napada ang text message nga naglakip sa coordinates.
***
Bag-ong linya sa militar human niatubang si Pangilinan sa mga senador: Gisuwayan nila pag-plot ang coordinates nga gihatag ni Napeñas sa mapa sa militar (di sa Google Maps) ug ilang nakaplagan nga ang dapit nga girekomendar nga bombahan maoy nahimutangan sa 84th Seaborne Company sa SAF.
Sa ato pa, nitataw ang kasundalohan, kon gituman pa nilang rekomendasyon ni Napeñas mas daghan untang mangamatay. 14 ka sakop sa 84th Seaborne Company, nga maoy nakapatay ni Zulkifli bin hir alyas Marwan, ang nakalingkawas sa kamatayon. Mahimong maapil og kapulbos ang ebidensiya--ang giputol nga tudlo sa terorista--nga positibong niila ni Marwan.
***
Ang Google Maps mahimong maggamit ni bisan kinsa nga may internet access. Maoy akong gigamit pagtultol sa tukmang barangay, lungsod o dakbayan nga sentro sa mga linog ug mga bagyo tungod sa kapakyas paghatag og mas detalyadong mapa sa Philippine Institute of Volcanology and Seismology ug Philippine Atmospheric, Geophysical and Astronomical Services Administration.
May sukaranan ang militar nga mas suhito sa Mamasapano nga mas kasaligan ang ilang mapa kay sa Google Maps nga kasagaran sa kasayuran user-generated ra. Ang kapakyas sa militar ug kapolisan sa pagsaw-anay di lang sa intelligence information ni Marwan, frequency sa ilang mga radyo ug bisan pagpili og kumon nga mapa sa ilang mga operasyon nakatampo sa trahedya sa Mamasapano. Nga madugangan pa kon di masulbad sa labing daling panahon.
- Latest
