Ikatulong target sa Mamasapano
Usa sa kalibogan nga nitumaw sa text messages ni Presidente Noynoy Aquino ngadto ni Direktor Heneral Alan Purisima, ang ni-resign nang hepe sa Philippine National Police, samtang nagpadayon ang bangis nga pinusilay tali sa mga sakop sa Special Action Force ug sa armadong mga rebelde sa Mamasapano, Maguindanao niadtong Enero 25, mao ang pagsige og hisgot ni Aquino sa ikatulong target sa operasyon.
Nisukwahi ni sa nahaunang kasayuran nga duha ra ang high value targets sa kontrobersiyal nga Oplan Exodus, ang Malaysian nga tighimo og bomba nga si Zulkifli bin Hir alyas Marwan ug iyang pangabaga nga lumad nga taga Maguindanao nga si Basit Usman.
***
Apan way bisan unsang nituki sa lahi nga kasayuran ni Aquino. Nganong human pahibaw-a ni Purisima nga napatay na si Marwan, nagsige man siya og pangutana kon makuha pa ba ang laing duha ka target? May ikatulo ba diayng kauban silang Marwan ug Usman nga nakaikyas sa ni-atake nga mga sakop sa 84th Seaborne Company sa SAF?
Tungod tingali sa kadinalian sa pagsusi sa ubang mga sirkumstansiya sa operasyon--nganong nag-apil-apil pa man ang suspendidong si Purisima, nganong gilaktawan silang Interior Secretary Mar Roxas ug PNP Chief Leonardo Espina ug nganong wa katabang ang militar sa naapiking SAF commandos--way nagtagad pagsusi kinsa ang ikatulong target nga gipangita ni Aquino.
***
Unang nitumaw ang ngan sa ikatulong target sa report sa Board of Inquiry sa PNP nga nibasol nilang Aquino, Purisima ug Direktor Getulio Napeñas, ang girelibohang hepe sa SAF. Pormal nga giangkon ni Napeñas nga tulo, di lang duha ang target sa ilang operasyon, atol sa iyang pag-atubang sa mga imbestigasyon sa buhatan sa Ombudsman gahapon.
Si Amin Baco o Abu Jihad ang ikatulong tumong sa Oplan Exodus. Gihulagway siya nga Malaysian sab sama ni Marwan. Kabahin silang Marwan ug Baco sa lima ka langyawng terorista nga gilambigit sa pipila ka kaso sa pagpamomba sa Mindanao. Kuyog ni Usman, gitoohan nga padayong nagtagutago si Baco sa Maguindanao.
***
Ang paglabay sa kapin sa buwan human sa engkuwentro sa Mamasapano una nitumaw ang ngan ni Baco magpahinumdom nato nga mahimong may mga aspeto sa Oplan Exodus nga wa pa tay kasayuran. Laing makapaikag sa atong pagduda mao ang nahibaw-an sa mga senador sa ilang executive sessions nga usa ka Amerikanhon ang nisugo sa militar paggamit na og artillery batok sa mga rebelde aron maluwas ang SAF commandos.
Hinaot nga tipigan nila ang ubang kasayuran aron lang pagpatigbabaw sa atong nasudnong seguridad. Ug di kabahin sa maniobra kon duna man pagtabon sa dugang responsibilidad nilang Aquino, Purisima, Napeñas ug uban pang mga opisyal ug personalidad nga mahimong hangtod karon wa pa kanganli.
- Latest
