Pagpangayo og pasaylo
Tungod sa ilang kabalaka nga kon moangkon og responsibilidad ug magpangayo og pasaylo sa trahedya sa Mamasapano, Maguindanao si Presidente Noynoy Aquino, mahuyang ang iyang liderato ug matay-og ang iyang pamunoan sa mga hulga sa kudeta, ang iyang mga dumadapig nisugyot sa mosunod nga katin-awan sa iyang pagtugyan sa Oplan Exodus ngadto ni Direktor Heneral Alan Purisima bisan gisuspenso na sa Ombudsman:
• Ang preventive suspension ni Purisima gitumong aron di siya makapanghilabot sa imbestigasyon sa kasong pagpangawkaw batok niya ug ang iyang pagduma sa operasyon di makaapektar sa imbestigasyon; ug
• Gisuspenso si Purisima isip hepe sa Philippine National Police di sa pagka polis.
***
Samtang temporaryo rang suspenso ni Purisima kay molungtad lang unta og unom ka buwan (di na hinuon siyang kabalik pagka hepe sa PNP kay ni-resign na dihang nabisto nga siya diay ang tagduma di lang magtatambag sa operasyon), hingpit ni ug di parsiyal.
Hingpit siyang gidid-an pagtuman sa iyang trabaho. Di lang isip hepe kon dili ug labaw na isip polis. Di siya mahimong tangtangon lang sa iyang White House sa Kampo Crame ug pabantayon sa trapiko sa nagkaguliyang nga Serging Osmeña ug Ouano avenues sa Cebu City ug Mandaue City. Kay hingpit sab siyang gidid-an pagdawat sa iyang suholan ug mga benepisyo.
***
Nilantugi sab ang mga dumadapig ni Aquino nga si Purisima ang naghupot ug nagpalambo sa intelligence information sa nahimutangan ni Zulkifli bin Hir alyas Marwan ug di mahimong ihatag niya ang sensitibong kasayuran ngadto ni bisan kinsa. Kay nag-ung-ong na mang operasyon, apiki na kon ipasa ang pagduma ngadto ni PNP Chief Leonardo Espina kay mobalik na sab sila sa uno.
Apan lehitimo ang suspension order batok ni Purisima gikan ni Ombudsman Conchita Carpio-Morales nga, samtang tinudlo ni Aquino, independente sa Malakanyang. Ug obligado silang Aquino ug Purisima pagtuman. Bisan ang labing taas nga opisyal sa nasud di kapili unsa nga kamandoan sa Ombudsman ang tumanon ug di tumanon.
***
Nagkadugay nagkadaghan nang nasulti ni Aquino ug nagkalisod na alang niya ang pag-angkon og responsibilidad ug pagpangayo og pasaylo. Hinaot nga tungod sa iyang determinasyon pagpalig-on sa mga institusyon aron magpadayon ang iyang gisugdang kausaban lapas sa 2016 makaamgo na siya nga di malaktod ang proseso.
Di paigo nga sigehan niya og pahinumdom ang katawhan nga nakaangkon na og pasiunang kadaogan ang kampanya batok sa pangurakot. Di paigo nga padayong nilambo ang ekonomiya tungod sa pagsalig sa mga negosyante sa kaligdong sa iyang liderato. Hinaot nga barugan sab niyang mithi sa kamatinud-anon nga nakapahimutang niya sa gahom. Nasayop siya sa sobrang pagsalig ni Purisima. Ug kinahanglan siyang mangayo og pasaylo sa nisunod nga nagsanga-sanga nga mga bulilyaso.
- Latest
