Lantaw sa kanhi manggugubat
Nasubo sa trahedya sa Mamasapano, Maguindanao ang retiradong pangu sa Scout Rangers nga gikagubat sa kasundalohan ug kapolisan sa Punta Engaño sa Dakbayan sa Lapu-Lapu niadtong dekada 80. Matod ni 2nd Lt. Melchor "Choy" Dela Sala anugon ang 44 ka sakop sa Special Action Force nga iyang gihulagway nga mga biktima sa pagpabaya sa ilang kadagkoan.
Niduaw sa "Arangkada" sa DYAB Abante Pa, Bisaya! si Dela Sala aron paghan-ok sa labing dakong responsibilidad sa trahedya ngadto nilang Direktor Getulio Napeñas, ang girelibohang hepe sa SAF, ug Direktor Heneral Alan Purisima, ang ni-resign nga hepe sa Philippine National Police. Gitataw niyang di sab makaikyas sa kontrobersiya si Presidente Noynoy Aquino.
***
Matod ni Dela Sala masabot ang hukom ni Napeñas sa pagtipig sa kasayuran sa presensiya sa gikaintapang mga terorista nga silang Zulkifli Abdhir alyas Marwan ug Abdul Basit Usman sa Barangay Tukanalipao sa Mamasapano. Kay human napakyas ang nangaging kasayuran anugon kon mabisto ang sekreto ug makasibat na sab ang mga dakpunon.
Apan sayop si Napeñas sa pagtago sa kasayuran gikan nilang Acting PNP Chief Leonardo Espina, Kalihim Mar Roxas sa Department of Interior and Local Government ug Heneral Gregorio Pio Catapang, hepe sa Armed Forces of the Philippines, matod ni Dela Sala, kay gikinahanglan kaayong ilang tabang paghimong mas epektibo sa operasyon.
***
Labing dakong sayop ni Napeñas nga nakit-an ni Dela Sala mao ang paglusad sa Oplan Exodus bisan sa kakuwang sa kasayuran sa ilang destinasyon nga nisangpot sa pagkaanod sa SAF commandos sa mga suba sa Mamasapano, pagkauwahi nila og duha ngadto sa tulo ka oras ug kapakyas pagtagbo sa wa pa sulnga ang tagoanan nilang Marwan.
Matod ni Dela Sala hukas sa tanang depensa ang 84th Company sa SAF nga maoy nakapatay ni Marwan kay wa pa kapahimutang ang ilang kaubanan pagpayong nila. Ang 55th Company, inay magsilbing blocking force, maoy nisuyop sa mga bala sa naglibot nga armadong mga tawo ug nakababag sa pagsud sa mas nauwahi nilang kaubanan.
***
Di angayng basulon si Presidente Aquino, segun ni Dela Sala, kay igo ra siyang nitugot ug wa nay labot giunsa pagpatuman ang plano. Labing dakong tulubagon ni Aquino mao ang padayon niyang pagtugyan sa operasyon ngadto ni Purisima bisan gisuspenso na sa Ombudsman sa Disyembre sa niaging tuig.
Nagduda si Dela Sala nga kahakog sa kredito maoy nakaaghat ni Purisima pagtago sa operasyon gikan sa mga opisyal nga makatabang unta nila. Kon nilampos pa labihan unta niyang humota ug modako ang kahigayonang makabalik sa katungdanan. Karong napakyas, napugos pag-resign si Purisima pagka hepe sa PNP ug, matod ni Dela Sala, hingpit nga nausik ang taas uyamot nga katuigan sa iyang pangalagad.
- Latest
