Dili g'yud makiangayon

Ang padayon nga pagtugot sa kagamhanan nga makahupot og mga armas ang mga tawo nga nagpuyo sa Mindanao, ilabi na ang mga Muslim, maoy naghatag og problema sa kahusay ug kalinaw sa mao nga dapit.

Ang Mindanao kabahin ra sa Pilipinas apan ang Firearms Law sa nasud, gikan pa sa Presidential Decree 1866, giusab sa Republic Act 8294 ug karon Republic Act 10591, wala mapatuman sa mga dapit sa Mindanao.

Kun dinhi sa Sugbo ug ubang bahin sa nasud dakpon kita bisan magdala og tayaon nga armas, didto sa Mindanao yano-yano lang ang mga tawo nga makadala-dala og armas ingon man pagtipig diha sa ilang balay.

Mao kini ang rason nga diha'ng mironda ang kapolisan didto sa gitagoan ni Marwan, sa usa lang ka senyas sa ilang mga lider, ang mga armasan nga sakop sa Moro Islamic Liberation Front ug Bangsamoro Islamic Freedom Fighters dali ra kaayo nga nagkatigum.

Para kanako, kun aduna may kasabotan ang kagamhanan nga naghatag og pabor sa MILF nga makadala-dala ug makatinil sila'g armas angay na kini nga putlon.

Tiaw mo, usa nako ka higala mitug-an nga nakapanglingo-lingo siya nga nagsud-ong sa sitwasyon didto sa Zamboanga. Nakita niya ang grupo sa mga Army nga hitsas sa tag-as nga kalibre sa armas.

Taud-taud, may nangabot usab nga grupo sa mga sundalo sa MILF nga didto sa atbang. Pulos usab armado og armas nga susama sa gihuptan sa Army. Nagtinan-away lang ang mga sakop sa masig ka grupo.

Mao kini ang nakaproblema. Kun sakop ka sa MILF ug magdala'g armas dili kini dakpon sa mga tropa sa kagamhanan kay mahadlok nga kun kini himuon, basin og atakehon sila sa mga MILF.

Ngano'ng dili man nato ipatigbabaw ang balaod ngadto sa tanan? Hain na man ang giingon nga "Nobody is above the law?"

***

Miagas na g'yud ang tubig gikan sa Metro Cebu Water District  didto sa Sitio Upper Fatima nga sakop sa Barangay Apas nga akong gihangyo aron kaserbisyohan ang mga nagpuyo sa mao nga lugar.

Dili pa g'yud hinuon daghan ang makapahimulos niini kay wala pa man hingpit nga nakonektar ang tubo ngadto sa "main line" sa MCWD. Apan 10 ka pamilya ang mahaw-as na sa pag-antos nga mobayad og 'tag P75 ang kada cubic meter nga tubig.

Kun ang MCWD magpabayad lang og P15 sa mata'g cubic meter (lima ka baril nga tubig), ang taga Sitio Upper Fatima nag-antos pagbayad sa kantidad nga kalima kapilo sulod sa daghan na'ng katuigan gikan sa mga nagnegosyo og tubig gikan ra gihapon sa MCWD.

Pahimudsan nako ang pagpasalamat ni MCWD Chairman Rene "Sangay" Mercado ug ni General Manager Ernie Delco, nila ni Engr. Edgar Ortega ug Engr. Joselito Vidal sa MCWD distribution division.

Kun dili pa tungod kaninyo, mag-antos unta gihapon sa mahal nga presyo sa tubig ang mao nga mga pamilya sa Sitio Upper Fatima. Salamat kaayo!

***

Ang mga sakyanan nga gamiton sa pagpamasahero kinahanglan g'yud unta nga presentable, dili makasakripisyo sa mga sumasakay, ingon man giatiman kanunay sa ilang mga tag-iya aron dili kini susama sa tan-awon sa mga "lungon nga nagdagan."

Mahimo ba og kamo'ng mga konsehal sa dakbayan sa Sugbo ug sa ubang mga dapit kalimtan usa ninyo ang inyong mga political interest ug himoan ninyo kini og legislative measure?

Dili man gud kamo mosakay og PUJ mao nga dili kamo makasinati kun unsa ang angay nga himoan og kausaban. Sakay 'sab kuno mo panagsa og PUJ.

Daghang mga PUJ nga inigsakay nimo mapakong ang imong ulo kay mubo kaayo ang atop. Ngano'ng gitugotan man kini'ng mga multicab nga gihimo'ng pasaheroan unya mubo kaayo'g atop?

Kun makalingkod ka na, ang imong ulo peligro kaayo nga maigo sa puthaw nga gunitanan nga anaa gipapilit sa kisame sa sakyanan. Unya, daghang mga PUJ nga ang sandiganan puwerte'ng sakita kay wala na ang foam nga imo unta nga kasandigan.

Dili ba angay nga maghimo ta'g ordinansa nga kun ingon niini ang sitwasyon sa sakyanan, dili nato usa padaganon?