Basiyo ni Pope Francis

Daghang caterers ang niboluntaryo pag-andam sa pagkaon ni Pope Francis atol sa lima ka adlaw niyang pagduaw sa Pilipinas ug Kabisay-an. Inilang caterers sa kaulohan, nga suki sa Artsidyosesis sa Manila pag-andam sa pagkaon sa pagduaw sa nangaging mga Santo Papa ug ubang inilang mga bisita, nipahibawo nang daan sa mga putahe nga ilang gisugyot nga angayng idalit sa Santo Papa.

Sa iyang pagduaw gikan sa Huwebes sa hapon hangtod sa Lunes sa buntag, upat ka panihapon, upat ka pamahaw ug tulo ka paniudto ang naabtan ni Pope Francis dinhi sa nasud. Way pahibawo diin siya mokaon. May mga pangagpas nga kasagaran sa iyang pagkaon gisilbi sud sa Apostolic Nunciature. Apan kitang tanan nahibawo diin siya naniudto niadtong Sabado.

***

Nakigsawo siya og paniudto sa 30 ka biktima sa bagyong Yolanda sa silangang Kabisay-an ug sa linog sa Bohol sud sa Archbishop's house sa Palo, Leyte taliwa sa kusog nga uwan ug hangin sa bagyong Amang. Nihangyo si Pope Francis nga di pasudlon ang media, bisan ang cameramen sa Vatican, sa pribado niyang pakigtagbo sa mga biktima.

Sila rang Luis Antonio Kardinal Tagle ug Palo Archbishop John Du ang gitugotang makauban. Nagdumili si Du pagtino unsay mga putahe nga ilang giandam. Si Kardinal Tagle igo lang nitug-an nga natandog ang Santo Papa ug naglisod pagtubag sa asoy sa mga biktima sa pait nilang kasinatian sa katalagman. Way sakop sa media nga nisuway pagtukas sa misteryo sa putahe sa paniudto.

***

Way mapahibawo sa sabot ang caterer sa Tacloban City nga si Cary Jaucian. Kinsa nakugang nga gikuha nga usa sa caterers kay bag-o pa sa industriya. Mas nakugang si Cary dihang gipahibawo sa Presidential Security Group nga siya ang mosilbi sa pagkaon ni Pope Francis.

Gidalitan ni Cary ang Santo Papa og init nga sabawng kamunggay sud sa panaksan ug usa ka platong humay, inasal nga baboy ug inasal nga manok. Naletratohan ni Cary ang Santo Papa nga nangaliya sa wa pa mangaon ug ang plato ug panaksan nga wa nay sud. Ikapuno na nato ang pagka di usikan og pagkaon sa maayong mga mithi ni Pope Francis.

***

Inay sa gitakdang duha ka oras, 15 ka gutlo rang paniudto kay giapura ang Santo Papa sa mga piloto, di luwas nga magdugay sa Leyte kay mahimong mas mokusog pang bagyo ug matanggong sila.

Ang kahinangop sa pagkakita ni Pope Francis gipulihan sa pagbangotan dihang giasoy sa mga biktima ang pagkagusbat sa ilang kabtangan ug pagkaangol ug pagkamatay sa mga sakop sa ilang pamilya. Bisan sa iyang pagpakahilom sa Santo Papa, gihulagway ni Cary nga napagaan niyang pagbangotan sa mga biktima, giagda silang maniudto ug, dungan sa pagkabasiyo sa iyang plato, giawhag paghurot sa ilang pagkaon.

[email protected].