Sugbuanon sa Palo
Labihan kahigpit sa seguridad nga gipahamtang sa Presidential Security Group sa Archbishop's residence sa Leyte, nga maoy kasamtangang pahuwayan ni Pope Francis sa iyang pagduaw sa Tacloban City ug Palo karong Sabado, nga Ang Sugbuanong Arsobispo nga si John Du pangutan-on sa mga sundawo sa iyang ngan ug katuyoan matag sud sa iyang pinuy-anan.
Ang pinuy-anan sa arsobispo nga nahimutang ibabaw sa bukid sa Barangay Arado sa Palo usa sa labing naggusbat sa pagkusukuso sa bagyong Yolanda niadtong Nobyembre 2013. Adto igahin ni Pope Francis ang dakong bahin sa unom ka oras niyang pagduaw nga maglakip sa pakigsawo og paniudto sa mga biktima sa bagyong Yolanda ug sa linog sa Bohol.
* * *
Nahibaw-an ni Rico Lucena sa ABS-CBN ang kalisod ni Du pagsud sa iyang kaugalingong pinuy-anan dihang nisuway siya og pananghid mahimo bang adto siya matug sa Biyernes sa gabii. Kon tugotan masaligon si Rico nga masipong niya ang tanang mahinungdanong kasayuran sa pagduaw sa Santo Papa gikan sa sud sa pinuy-anan nga maoy sentro sa tanang kalihokan.
Gipasabot siyang Du nga ang tanang kawani sa artsidyosesis, sama niya, gipaubos sa makuti nga imbestigasyon sa PSG di ba sila mamahimong tinubdan sa hulga batok ni Pope Francis. Naneguro si Du nga kon ipadangat sa PSG balibaran nilang hangyo ni Rico.
* * *
Wa gyod magdahom si Du nga siyay makahupot sa labing mahinungdanong papel sa pagduma sa makasaysayanong pagduaw ni Pope Francis sa labing makaluluoy nga mga biktima sa katalagman. Ang 60 anyos nga lumad sa Bantayan, Sugbo way ideya nga human mo-asumir sa artsidyosesis nga nagduma sa Leyte, Southern Leyte, Biliran ug tanang lalawigan sa Samar modayon pa gyod sa iyang pinuy-anan ang kalibotanong pangu sa 1.2 bilyones ka Katoliko.
Apan takos si Du sa lisod niyang tahas. Nabaraw niyang bugno sa lokal nga mga politiko kansang pagtinabangay gikinahanglan sa pangandam sa pagduaw. Napatuman sang sugo sa Vatican nga way dagway ni Pope Francis ug ngan sa mga politiko ug mga negosyo sa ruta sa motorkada gikan sa Tacloban paingon sa Palo.
* * *
Bisan gilaktawan ang Sugbo, wa niya igsapayan ug mahimong may nagpaabot nga mas dagkong kahigayonan alang niya, apan pasayloang di kong kapugong paghisgot sa di lang usa kon dili duha gyod ka kawad-on ni Cebu Archbishop Jose Palma sa Papal visit:
•Kon wa pa siya mapulihi ni Du niadtong Pebrero 2012, si Palma unta ang host ni Pope Francis sa Leyte tibuok adlaw karong Sabado; ug
•Kon nagpapili pa alang sa ikaduhang sunudsunod nga termino pagka presidente sa Catholic Bishops Conference of the Philippines, siya unta inay si Archbishop Socrates Villegas ang kuyog ni Pope Francis sa Popemobile sa Manila ug Leyte.
- Latest
