Wa mag-apurang Kapitolyo
Dayong bag-ong tuig, nipasidaan nang daan ang mga tagduma sa Cebu South Bus Terminal, nga nagbase sa Dakbayan sa Sugbo apan giduma sa Kapitolyo, nga malangay ang kinabag-an sa mga pasahero nga mamauli sa kalungsoran ug kasilinganang mga lalawigan. Kay natanggong ang 200 ka buses sa pagkabanlas sa approaches sa Dumlog Bridge sa Simala, Sibonga tungod sa bagyong Seniang. Matod ni Eddie Dusaban Sr., tagduma sa terminal, nga di paigo ang 60 ka buses nga nahibilin sa Metro Cebu paghakot sa gibanabanang 10 mil ka pasahero.
Way tingog si Gobernador Junjun Davide. Ambot nagbakasyon ba, o wa motuo sa iyang sinaligan sa terminal, o way pagpakabana sa dangatan sa mga pasahero.
***
Tuod man, taas kaayo ang linya sa natanggong nga mga pasahero sa terminal. Natinuod ang kahadlok ni Dusaban nga di paigo ang nahibiling 60 ka buses. Kay bisan ang Suroy-Suroy buses sa habagatang kalungsoran naapil og katanggong sa di kaagian nga taytayan sa Sibonga. Maong napugos si Dusaban pagpakitabang ni Cebu City Mayor Mike Rama. Kinsa wa managana pagpakatap sa pipila ka Kaoshiung buses.
Wa gihapoy tingog si Davide. Ambot nagbakasyon ba, o gipasagdan lang nga naapiki ang mga tagduma sa terminal, o wa lang gyoy pagpakabana sa kaliboan ka pasahero nga nahasol nang daan sa terminal sa wa pa tiwasi sa mas dakong kaguliyang sa dawat-dawat sa Sibonga.
***
Hangtod nga nitumaw ang mga taytayan nga hinimo sa nipis nga tabla ug gagmayng kawayan. Pinugos man o dili, nangolekta og P5 ang mga nagbantay sa matag niagi nga pasahero. Gipasigarbo sa lokal nga mga opisyal nga may alternatibo nang agianan alang sa gagmayng mga sakyanan, hinikalimtan nga ang kinabag-an way sakyanan ug nga ang labing sayon ug laktod nga agianan kinahanglang ipahimutang sa di maagian nga taytayan.
Wa lang gihapoy ek si Davide. Niapil hinuon og latay sa taytayan ug igo lang nihangyo nga palig-unon ug di na pabayran.
***
Sa unang adlaw sa trabaho sa bag-ong tuig 2015, gipahibawo sa buhatan ni Davide nga makigtagbo siya sa mga opisyal sa Barangay Simala, munisipyo sa Sibonga, sa Department of Public Works and Highways ug Philippine National Police mahitungod sa mga problema nga namugna sa di maagian nga taytayan.
Nganong nagpaabot man si Davide nga mahuman ang holidays una molihok? Wa bay nakatambag niya sa kadinalian sa panginahanglan pagpahapsay sa transportasyon atol sa holidays? Wa bay nakapahinumdom nga siyay amahan sa Sugbo, nga kinahanglang moatiman sa mga panginahanglan sa mga Sugbuanon, bisan sa puwa nga mga petsa sa kalendaryo?
Klaro hinuong wa magdali si Davide. Ang unang adlaw sa trabaho sa 2015 kutob ra sa pagpatawag og tigom. Ang aktuwal nga tigom sa ikaduhang adlaw pa.
- Latest
