Binay hadlok g'yud

Nahadlok g'yud si Vice President Jejomar Binay nga moatubang sa subcommittee sa Senate Blue Ribbon Committee nga nag-imbestigar karon sa giingong paghupot niya og kwestyonable nga katigayonan.

Para nako, angay'ng si Binay moatubang gayud sa mga senador pamasin nga makabangon pa siya niini'ng iyang pagkalukapa tungod sa daghang aanomaliya nga gipasangil kaniya.

Dagko kaayo ang mga isyu nga gipasangil kang Binay. Usa niini mao ang giingon nga kalambigitan sa pagpa-overprice sa pagpatukod sa Makati City Parking Building unya nanag-iya pa usab kini og kapin sa 300 hektareya nga kayutaan sa Rosario, Batangas.

Kun walay nahimo'ng sayop si Binay nganong mahadlok man siya? Atubanga ang imbestigasyon kay ang mga tawo karon anam-anam na g'yud nga nadismaya kaniya base sa mga sentimento sa radio.

Tiaw mo, si Binay man g'yud diay ang mihangyo nga magkita sila ug si Presidente Aquino sa pamasin nga makatabang ang presidente nga mahunong na ang imbestigasyon sa Senado Blue Ribbon Committee batok kaniya.

Dili diay tinuod nga si Binay maoy gipatawag ni Presidente Aquino aron magpakisayod kabahin sa mga dili maayo'ng report batok kaniya. Pastilan, ngano nga mahadlok man g'yud si Binay nga moatubang sa sub-committee nga gipangulohan ni Senador Grace Poe?

Tinuod ang pangagpas sa uban nga kun si Binay dili makabangon sa kontrobersiya nga iyang giatubang, hayan nga mosaka pagsamot ang ka-popular sa higpit niya'ng karibal sa politika nga si DILG Secretary Mar Roxas.

Wala malilong sa tibuok nasud nga si Roxas nangambisyon pa g'yud nga mahimong presidente ug hangtod karon wala pa makadungog ang katawhan nga aduna siya'y dili maayo'ng binuhatan.

Sa ato pa, kun papilion ang katawhan kanila'ng Binay ug Roxas nahadlok ko nga ang bise presidente dili maoy ilang pilion. Busa mentras sayo pa, labing maayo nga si Binay moatubang na lang sa senado og tubagon ang mga isyu.

***

Mitumaw karon ang isyu tali kanila ni Mayor Michael Rama ug Kanhi Kongresista Tomas R. Osmeña kabahin sa plano nga paghimo sa Doña Pepang Cemetery isip public park.

Si Tommy gud mitataw nga dili siya gusto nga mahimong park ang mao nga sam-ang apan si Mayor Michael Rama mipakita kagahapon og suwat nga adunay pirma ni Kanhi Mayor Osmeña nga naghangyo ni Kanhi Arsobispo Ricardo Cardinal Vidal nga idonar ang lote kay aron himuon nga park.

Matud ni Rama nga igo lang siya nga mipatuman sa daan na nga plano sa dakbayan. Akong gihinabi si Tommy kabahin niini'ng isyu ug iya kong giingnan nga wala siya makahinumdom nga may gipirmahan siya nga suwat.

Taud-taud na g'yud hinuon ang mao nga suwat nga gipresentar ni Mayor Rama atol sa press conference kagahapon. Ang suwat gipetsahan og Hulyo 16, 2008 ug gi-countersign kini sa Kanhi City Administrator nga si Francisco "Bimbo" Fernandez.

Matud ni Tommy nga kun duna man gani kini nga suwat, ang iyang katuyoan mao ang pagpanindot sa menteryo, ilabi na ang karsada nga nahimutang sa entrada sa sam-ang nga karon hagip-ot kaayo.

Buyno, sagdi na lang. Kun tinguha ni Mayor Rama nga panindoton ug himuon nga park ang maong sam-ang, ang importante nga dili gub-on ang Osmeña Mausoleum nga nahimo na nga kabahin sa history kay ang nagpatukod niini mao si Kanhi Presidente Sergio Osmeña Sr.

Gipatukod diay kini nga mosoleyo sa mga Osmeña ni Don Sergio kaniadto diha nga ang iyang asawa nga si Estefania namatay ug gilubong diha. May tinguha usab si Don Sergio nga kun siya mamatay, anha siya ilubong.

Apan wala kini mahitabo kay dihang si Don Sergio namatay, ang iyang patay'ng lawas didto gilubong sa Libingan ng mga Bayani sa Manila.

***

Ang tigpasiugda sa Horror Booth sa Mandaue wala g'yud tawon maghuna-huna sa kahimtang sa mga tawo nga gigamit nila nga "cast" sa ilang pagpanghadlok.

Dako kaayo sila og nakuwarta kay puwerteng daghana nga mitan-aw sa pagtuo nga sila bation og kalisang, apan wala g'yud tawon. Puwerteng inita sa sulod niadtong mga plastik nga sako nga gituyok-tuyok nila nga tua magtago ang mga "mahuyang" nga cast.

Nangreklamo tawon ang mga cast ug akong nadunggan ang usa kanila nga mitug-an sa usa ka babaye nga "mamatay na mi sa kainit Ate."

Siyaro, wala g'yud sila kabutang og aircon?