MCWD salamat kaayo!

Unahon nako ang dako kaayo'ng pagpasalamat sa kadagkoan sa Metro Cebu Water District nga gipangulohan sa akong sangay nga si Rene Mercado isip tsirman ug ni higala'ng Ernie Delco nga natudlo nga bag-ong general manager.

Tungod kanila, daghang pamilya diri sa Sitio Fatima, sakop sa Barangay Apas, dakbayan sa Sugbo makalingkawas na gayud sa pagkagapos namo sa dagko kaayo nga bayranan sa tubig sulod sa daghan na nga katuigan.

Walay direkta nga koneksyon sa tubig gikan sa MCWD ang among dapit nga gipuy-an mao nga nakahigayon ang mga adunahan sa pagkonektar og tubo sa tubig aron kami makatubig, apan ang gipabayad kanamo ta'g P75 ang matag cubic meter.

Diha nga may pipila nga nagpakonektar ug kaugalingon nga linya ug gisundog ang mao nga negosyo sa tubig ug mitanyag og menus nga presyo, kadto'ng mga nag-una sa negosyo napugos pagpakunhod apan P72 gihapon ang cubic meter.

Makadaghan nga higayon nangayo ko'g tabang sa mga opisyal sa barangay kay sila man maoy angay nga mohimo kay aron maserbisyohan ang ilang mga botante, apan walay nahimo.

Napugos ko paghangyo sa akong sangay ug sa bag-ong general manager sa MCWD ug salamat nga giaksyonan dayon. Karon gipaspasan nila ang pagtaud sa dagko kaayo nga mga tubo paingon sa among lugar. Bisan og Domingo walay hunong.

Saludo ko ninyo 'ngay Rene ug higala'ng Ernie!

***

Bitaw, ang mga opisyal sa barangay angay g'yud unta nga motan-aw kun unsay maserbisyo nila sa katawhan nga nagpuyo sa ilang dapit. Dili kay maayo lang kita mosaad panahon sa eleksyon.

Dili ba ang barangay duna may gitawag og mga "district councilmen?" Kun kinsa kadto'ng mga konsehal nga nadistino pagsuperbisar sa distrito, sila maoy motan-aw sa panginahanglan sa mga nagpuyo sa ilang teritoryo.

Kun adunay mga suga sa poste nga pundir, kamo maoy moatiman. Kun dili mahimo sa barangay, dad-a ang problema sa opisina sa City Hall nga hingtungdan aron mahatagan kini og sulbad.

Subo kaayo kay kun dili nimo komentaryohan sa radyo ug mantalaan dili man mokihol. Salamat na lang nga ang pundir nga mga bombilya diri sa among sitio gipailisan na nila ni Kapitan Ramil Ayuman ug ubang opisyal. Salamat Kap!

***

Si DILG Secretary Mar Roxas nag-awhag g'yud sa mga opisyal sa kabarangayan nga motabang unta aron molampos ang slogan ni Presidente Aquino nga "Daan'g Matuwid."

Tan-aw nako dili kini matuman kay daghan sa mga opisyal nga mahadlok mohimo'g lakang pagpakgang sa binuang kay mahadlok nga adunay masuko kanila ug mahadlok nga sa sunod eleksyon dili na makadaug.

Mensahe ni Roxas sa mga opisyal sa barangay "Puwede kayo'ng maging taga-paghatid ng pangangailangan ng inyong mga kababayan." Kun mahadlok mo, tumana ang giawhag ni Roxas nga ireport lang ninyo ang mga binuang sa mga opisina sa DILG.

Diay numero nga inyo'ng ma-teksan o matawgan aron hatagan sa inyo'ng report. Sa DILG ni nga numero - 09176276927.

***

Kamo'ng mga post paid subscribers sa Globe pagbantay g'yud mo sa binuang sa mga tawo nga nagpatuga-tuga paghupot og cellphones apan walay kuwarta ibayad og load.

Padad-an mo og message nga inig-open ninyo, makita ninyo dayon ang word nga gikan kunohay sa Globe ang mensahe. Pasabton ka sa mangingilad nga nakahimo ka og tawag sa "roaming" nga numero nga ang bayad P300.

Ingnon ka nga kun gusto nimo nga ma-lifted ang bayad, kinahanglan nga mo-text ka og 300 ug i-send nimo sa numero nga ilang ihatag. Pananglitan 29176276927. Dunay uban nga mailad niini.

Kun Globe gani, sa pag-ilis nimo og (2) sa (0) sa una'ng numero sa cellphone, makahimo ka na og "share-a-load." Kadto'ng 300 nga gipa-text nimo ug ipa-send sa 29176276927, diha-diha maka-share a load ka na ngadto sa 0917-627-6927.

Pagbantay g'yud mo ana nga binuang. Mahibaw-an ninyo nga ilad ang mensahe kay ang sender numero ang mogawas ug dili ang naandan nga upat ka numero nga gikan sa Globe Telecom.

Maayo unta og nakatabang ko nga dili kamo mabiktima.