Binay ug Purisima
Managsama silang Bise Presidente Jejomar Binay ug PNP Direktor General Alan Purisima nga gipasanginlan nga nakatumpi og ilegal nga katigayonan. Managsama silang gi-imbestigar sa mga senador. Managsama sang nabisto ang kontrobersiyal nilang kabtangan pinaagi sa aerial video nga nakuha sa mga helikopter. Managsama silang nihimakak sa bisan unsang kahiwian.
Managlahi hinuon ang ilang paagi pagpanalipod sa ilang kaugalingon. Si Binay nagdumili pag-atubang sa imbestigasyon sa Senate Blue Ribbon Subcommittee samtang si Purisima maisugong nangutana sa mga pangutana sa mga sakop sa Senate Committee on Public Order. Pulos sila gisabonan--si Binay tungod sa iyang paglihay-lihay ug si Purisima tungod sa taphaw niyang mga tubag sa mga pangutana.
***
Pulos sila nitulisok sa ilang mga kaatbang nga maoy responsable sa pag-apiki ug pagpakauwaw nila: Si Binay nisumbalik nga iyang karibal nga mga politiko maoy nagtinguha pagsabotahe sa iyang kandidatura pagka presidente sa 2016; sa pikas nga bahin, si Purisima nitumbok sa iyang gibungkag nga sindikato nga namaligya og pekeng mga lisensiya sa armas nga maoy nanimawos niya.
Pulos sab gipahiyos ang gidak-on sa kabtangan nga gilambigit nila: Si Binay niingon nga siyam ra sa 350 ka ektarya nga asyenda sa Cavite ang iyang gipanag-iya sa wa pa ibaligya niadtong 2010; si Purisima niinsistir nga P3.7 milyones rang iyang bay sa Nueva Ecija nga gibanabana sa mga namasangil niya nga balor og P50 milyones.
***
Managsama silang Binay ug Purisima nga may katin-awan sa gitipigan nilang kabtangan:
• Si Binay nipasabot nga niburot pag-ayo ang iyang kabtangan (gikan sa P2.5 milyones sa 1988 ngadto sa P60 milyones sa 2013) tungod sa dakong kita sa iyang negosyo sa baboy ug sa negosyo sa buwak sa iyang asawang si kanhi Makati City Mayor Elenita Binay sa Rosario, Cavite; samtang
• Si Purisima niingon nga ang tinigom gikan sa iyang kakugi ug paningkamot maoy nakapalit sa 4.7 ka ektaryang luna nga gitukoran sa iyang bay sa San Leonardo, Nueva Ecija.
***
Pulos sab sila gipasanginlan nga mga eksperto sa palusot:
• Si Binay gitumbok nga nimaniobra sa gisubasta nga mga proyekto sa Makati aron makabolsa og labing menos 13% nga komisyon sa tanang transaksiyon ug niggamit og dummies aron pagtago sa iyang pagpanag-iya sa kabtangan sa Makati, Cavite ug ubang bahin sa nasud; ug
• Si Purisima gibugalbugalan tungod sa iyang kamahiligon pagdawat og gidudahan nga mga suburno nga gipatuo lang nga mga donasyon gikan sa iyang mga suod, sama sa P11 milyones nga White House sa Kampo Crame nga gipatukod sa tulo ka higala niyang kontraktor ug baratilyo nga P1.5 milyones (inay sa tinuod nga presyo nga P4 milyones) nga Toyota Land Cruiser Prado gikan sa kinaham niya nga dealer sa San Fernando, Pampanga.
- Latest
