Padayong pagluok sa suholan
Ang maayong balita mao nga nagkauyon ang mga sakop sa Regional Tripartite Wages and Productivity Board (RTWPB) sa pagpuno sa P13 nga cost of living allowance (COLA) sa minimum nga suholan sa mga mamumuo sa Sugbo ug Central Visayas. Ang daotang balita mao nga di ni mapatuman dayon.
Kinahanglan pang ipatawag ang public hearing, nga mapahigayon lang 15 ka adlaw human sa publikasyon. Gawas pa, wa igdungog ang RTWPB-7, labi nang mga representante sa gobiyerno ug mga negosyante, nga mag-apura alang sa kaayuhan sa mga anak sa singot. May sukaranan ang kahadlok nga unya na sa Enero 2015 mapatuman ang dugay nang giawhag sa mga mamumuo.
***
Bisan mapatuman nang kauyonan sa RTWPB-7, di madugangan ang suholan nga mada sa mga mamumuo sa ilang mga panimay. Kay way bisan usa ka dako nga mapuno sa ilang suholan, igo lang iipon ang COLA ngadto sa basic wage.
Ang bentaha mao nga madugangan og gamay ang mga benepisyo sa mga mamumuo. Kay ipasikad na man sa inusbawang suholan ang kuwentada sa ilang 13th month pay, overtime pay ug ubang batakan nga mga benepisyo. Mao nga ang dugang kalangay magkahulogan sab og dugang kalangay sa mga benepisyo nga hagbay ra untang nadawat sa mga mamumuo sa Sugbo ug sa rehiyon.
***
Labing dakong kapildehan sa mga anak sa singot nga segurong di angkunon sa mga sakop sa RTWPB-7 apan maoy pait nga kamatuoran mao ni: Maalkanse sila og di lang usa kon dili duha gyud ka tuig nga balor sa paglambo sa minimum nga suholan.
Wa kadawat ang mga mamumuo o uminto sa suholan sa niaging tuig kay giulug-ulogan sila og P13 nga COLA. Sa ato pa, COLA ang gipuli sa tinuig unta nga pagtubo sa minimum nga suholan. Karon, nga makaangkon na sab unta ang mga mamumuo og laing usbaw sa suholan, wa na say uminto nga mapatuman kay ang COLA igo ra mang iipon sa basic wage.
***
Kining labing uwahing pakauwaw igo lang makapahinumdom nato sa ka wa na gyo’y kapuslanan sa wage boards. Angay ibalik na sa Kongreso ang gahom sa pagsubli ug pagtakda og makiangayon nga usbaw sa minimum nga suholan. Ang wage boards mas ganahang modangop sa technicalities paglangay-langay kay sa pagtuman sa tinuorayng mandato nga igo lang gipahuwaman sa Kongreso.
Mahimo rang bungul-bungolan ang mga mamumuo sa mga sakop sa wage boards nga pulos tinudlo sa Malakanyang. Mas mapugwat sa mga demanda sa mas makiangayong uminto sa suholan ang mga kongresista ug mga senador. Kay kinahanglan silang moatubang sa mga botante aron makatungtong sa katungdanan. Samtang magpapating lang ang mga sakop sa wage boards sa sentimento sa publiko, mapugos sa pagpaminaw ang mga magbabalaod.
- Latest
