Pagsanong sa hagit
Si Phoebe Kaye Fernandez, Star Patroller sa TV Patrol Central Visayas, ang nipahibawo nako sayo ning semanaha nga naapil ko sa Ice Bucket Challenge sa akong higalang DJ sa Monster Radio nga si June Rabin. Giawhag kong Phoebe sa pagsusi sa Facebook kay gibutang ni June ang video sa iyang hagit sa akong timeline.
Sunod namong kita ni Phobe ako siyang gipasaligan nga wa pa kong kaabli sa Facebook busa, technically, wa pa mapupos ang 24 oras nga tagal pagtubag sa Ice Bucket Challenge. Hangtod nga niadtong Miyerkules si Rico Lucena sa Maayong Buntag Kapamilya nagkatawang nipahibawo nako nga manghagit atubangan gyod sa kamera si LTFRB 7 Regional Director Ahmed Cuizon.
***
Hinaot makasabot ka nganong nanagana ko sa pagtubag sa Ice Bucket Challenge. Alang nako, di ko takos ug wa koy angay ug wa na ko kinahanglana. Natubag nang hagit sa labing gamhanan ug adunahan ug inilang mga personalidad sa tibuok kalibotan. Nganong maghilas-hilas pa man ko og puno sa taas nga uyamot nga listahan?
Niabot na og dul-an sa 100 milyones dolyares ang natigom sa mga tigpasiugda ug nahibawo na ang tibuok kalibotan sa dako ug dinaliang panginahanglan sa pagpangita og tambal sa makamatay nga sakit nga ALS (Amyotrophic Lateral Sclerosis). Unsa pa may akong ikapuno?
***
Apan sa wa pa mahinayak pagsalikway sa hagit, akong naamgohan nga kon nagpadaog pa lang sa ilang panagana ang labing unang nitubag sa Ice Bucket Challenge magpabiling misteryuso ang sinugdanan ug magpadayon nga way kaayuhan ang ALS, nga nakaigo na di lang sa labing inila ug adunahan sa ubang kanasuran kon dili nakakalas na sab og mga kinabuhi sa atong kaugalingong nataran.
Gawas pa, kasinatian sa tulo na ka dekada nakong pagpanibya nagtudlo nako nga way mobarug nga bisan unsang kawsa, batok man sa pangurakot, o pagtambal sa labing masakiton, o pagtabang sa labing kabos, kon di manginlabot kitang labing gagmay.
***
Mao nga bisan sa pasidaan sa akong asawa nga di na ko batan-on, namalit mi og ice, nikuha og bag-ong sapot sa among bay, gibubo namong ice sa duha ka balde ug dihang nagsugod na og tunaw gipalihug nako si Rico pagbubo nako. Tungod sa pamugos ni Carine Asutilla, Associate Producer sa Tubag! sa ABS-CBN, makita nimong kinatibuk-ang pakauwaw karong Sabado sa alas-7 sa buntag sa Channel 3 ug DYAB Teleradyo sa SkyCable Channel 38. Nitampo ko og $100 online sa alsa.org pinaagi sa credit card.
Tuguting akong hagiton pagtubag sa Ice Bucket Challenge ang TV Patrol Central Visayas pinangulohan nilang Station Manager Tata Cinco-Sy ug News Manager Mary Ann Uy; DYAB Radyo Patrol pinangulohan ni June Perez; ug KBP Cebu Chapter pinangulohan ni Chairman Jun Tagalog.
- Latest
