Way makaugdaw sa paglaom
Ang pito ka iro ni Estrella ug ang mga sangkap sa pagpamintal ni Jerson ang giuna pagluwas sa magtiayong Calo dihang niulbo ang dakong sunog nga niugdaw sa ilang panimay sa Sitio Palma, Barangay San Roque sa Dakbayan sa Sugbo niadtong Agosto 8. Maayo na lang nga didto pa ang duha nila ka anak sa eskuylahan.
Sama sa ilang mga silingan, naugdaw ang kasagaran sa ilang kabtangan. Matod ni Estrella wa siyay nahipos sa mahinungdanong mga gamit sa kusina ug panimay. Naugdaw sab ang labing bililhon nga mga pinintal ni Jerson. Nahanaw ang mga bunga sa ilang kahago busa kinahanglan silang magsugod pag-usab.
***
Sa tanang biktima sa sunog sa Palma, si Estrella ang nakadapit sa pagtagad sa mga sakop sa media. Samtang kasagaran sa mga nabiktima nangayo og mga hinabang nga pagkaon ug mga sinina, nabatian nako si Estrella nagpakitabang ni June Berongan sa DYAB Radyo Patrol asa ipahimutang ang pito niya ka iro.
Pagduaw namo sa bag-ong evacuation center sa mga biktima sa sunog sud sa nasunog sang building sa M. J. Cuenco Avenue, nadapit ang among pagtagad sa usa ka lalaki nga nagpintal sa hulagway sa bag-ong kinasal samtang iyang asawa ug anak nakighagwa sa ilang iro. Didto mi nagkita nilang Jerson, Estrella ug sa ilang pamilya.
***
Bisan supak sa iyang kabubut-on, apan tungod sa kainit ug kapait sa ilang kahimtang sa evacuation center, napugos si Estrella pagbilin sa unom sa pito niya ka iro sa Cebu City Pound. Usa ray iyang gida, si Kimkim. Di tungod kay pinalabi, nipasalig siyang managsama ang iyang pagpangga sa tanang iro, kon dili tungod kay nahimugso si Kimkim nga may kakulian ang duha ka panguwahiang tiil.
Bisan ganahan sab sa mga iro, niangkon ang mga anak nilang Jerson ug Estrella nga may mga higayon nga mangigi sila nilang Kimkim ug kaubanan. Kay samtang silotan sila kon magpabadlong, wa silang kahinumdom nga may iro nga nabunalan bisan kausa na lang.
***
Si Jerson usa sa mga pintor sa Sandiego Dance Company. Pagtabang niya pagbangon pagbalik, padayon siyang gihatagan ni Val Sandiego, ang tagduma sa kompaniya, og mga pintalunon nga mahimo ra sud sa evacuation center. Usa sa labing dako niyang gimbuhaton mao ang pagpintal ug pagdibuho sa mga konsepto ni Val sa props sa mabulukon nilang dancing contingent sa matag Sinulog Grand Parade.
Wa hatagi og tagal si Estrella kanus-a kuhaon ang iyang mga iro gikan sa City Pound. Apan nabalaka siya nga mangamatay na ang mga iro sa kamingaw sa di pa sila makatukod pagbalik sa ilang bag-o nga pinuy-anan. Apan ang determinasyon ni Jerson ug ang kamahigugmaon ni Estrella nagtug-an namo nga makasugakod sila ning katalagman.
- Latest
