Pagpabarug sa Palma
Palma, San Roque, Cebu City – Unang gisugyot ang pagtukod og tulo ka upat ka andana nga buildings nga balhinan sa mga molupyo aron nga di na sila maghuot dinhi pila ka buwan sa wa pa moulbo ang dakong sunog nga niugdaw sa kabalayan sa niadtong Agosto 8. Ubos sa sugyot mabakante na’ng tulo ka metro nga luna gikan sa baba sa sapa ug duha ka metro nga luna daplin sa dan nga mahimo nang sidewalk.
Maong masaligon ang kadagkoan sa barangay ug sa City Hall nga human sa nagpadayong reblocking mahingpit nang plano ug mapatuman sa labing daling panahon ang proyekto. Apan lahi ang panglantaw ni Mayor Mike Rama pagbalik niya gikan sa Estados Unidos.
***
Matod ni Barangay Kapitan Boy Miranda giawhag siya sa mayor og luna nga tukoran og kapilya ug bakanteng luna nga mahimong duwaanan sa mga bata ug tapokanan sa mga dagko. Gidalidali nila pag-usab ang plano.
Ang orihinal nga plano makapapuyo sa tanang 160 ka pamilya nga nawad-an sa ilang mga panimay. Apan ubos sa inusab nga plano, 60 ka pamilya na lang ang makabalik pagpuyo dinhi. Padayon pang gituki ripahon ba o unsaon pagpili ang mga pamilya nga makabalik ug ang mga pamilya nga dasigon sa pagsuway sa nagkalainlaing relocation sites nga giandam sa City Hall.
***
Laing sugo ni Rama mao ang pagtino sa tinubdan sa pundo nga maggamit alang sa proyekto. Nipasalig si lawyer Collin Russell sa Division for the Welfare of the Urban Poor nga may pundo ang iyang buhatan. Apan niinsistir si Rama nga tinuon ang pundo sa di pa pormal nga ilusad ang proyekto.
Sa kasamtangan, nalinga si Miranda pagpangita og alternatibong evacuation center alang sa mga biktima sa sunog. Kay gipasidan-an siya sa mga Tanchan nga gamiton na nilang nasunog nga building nga gipabalhinan sa ubang mga biktima kay naghuot na pag-ayo sa San Roque Gym ug nisuyla na gani sa kadalanan sa palibot.
***
Di lang usa kun dili duha ka wheelchairs ang nadawat nga hinabang sa TV Patrol Central Visayas alang sa biktima sa sunog nga di makalakaw. Si Anania Manatad, 78, maoy unang giyayongan sa iyang pamilya pag-ulbo sa kayo maong naugdaw ang iyang karaang wheelchair uban sa bay. Kay usa ra may iyang magamit, nisugot si Nang Anania nga ihatag namong ikaduhang wheelchair sa laing biktima sa sunog nga di makalakaw, si Lucrecia Maloloy-on, 64.
May laing biktima sa sunog nga di sab makalakaw nga nangayo sab og wheelchair. Si Lola Linda Malco, 71, kinahanglan nang kuguson sa iyang apo nga si John-John, 14, kay di na makalakaw tungod sa diabetes. Kun may hinabang ka, palihug ihatod sa San Roque Gym o sa ABS-CBN Broadcast Complex.
- Latest
