Pagpahiyos og highway
Ibo, Lapu-Lapu City -- Sama sa mga molupyo dinhi, nahibung ang mga motorista ug mga pasahero sa nahitabo sa Manuel Luis Quezon Avenue, sa paghiyos sa unom ka lane nga nasudnong highway gikan sa unang taytayan sa Mandaue ug Mactan nga nitabas dinhi. Nahugno ang kasagaran ug nasuko ang pipila nga nagpaabot nga mas mapalapdan untang ilang agianan tungod sa P300 milyones nga Mactan Circumferential Road Project.
Labing kuyaw nga bahin mao ang likoanan sa unahan sa Gate 3 sa Mactan Export Zone. Kon moinsistir ka pagsubay sa imong lane gikan sa Marina Mall, peligro kang mabanggaan kay human sa gamayng liko ikasugat nang mga sakyanan gikan sa pikas nga tumoy sa dan.
***
Giangkon ni Direktor Ador Canlas sa Department of Public Works and Highways sa Sugbo ug Central Visayas nga wa pa mahuman ang proyekto. Gihunong lang una sa pribadong kontraktor samtang giusab pa sa iyang mga inhinyero ang desinyo sa dan.
Matod ni Canlas napugos sila sa pag-usab sa orihinal nga plano sa proyekto tungod sa pagsalikway sa Department of Environment and Natural Resources sa ilang aplikasyon pagpamutol sa mga punoan sa kahoy nga maigo sa pagpalapad sa dan. Nabalaka hinuon ko nga sagol sabotahe uban ang abundang suplay sa pangluod ang ilang pagpahiyos sa agianan.
***
Gawas nga gikahon ang gagmay pang mga punoan sa Mahogany, mas gipalapdan pa gyod sa DPWH ang sidewalk. Sa usa ka bahin sa likoanan nga kinahanglan kang modalidali og balhin sa pikas nga lane aron di mabanggaan, nasukod nako nga tulo ka dangaw ra ang gilapdon sa outer lane gikan sa sidewalk, samtang siyam nako ka lakang ang gilapdon sa sidewalk.
Maayo na lang nga wa koy bisan gamayng alamag sa mga paagi pagtukod sa dan. Kay mangahas gyod unta pagpangagpas nga ang tinuod nga tuyo sa mga inhinyero sa DPWH mao ang pagtukod og sidewalk ug pakapin na lang ang mas pig-ot nang highway.
***
Nitataw si Canlas nga samtang nahimangod ang mga motorista sa paghiyos sa ilang agianan, gihangop sa mga mahiligon sa paugnat sa kusog ang pagmugna nila og hamugaway nga bicycle lane ug joggers lane. Nahadlok kong wa mapahibawo ni Canlas ang mga siklista ug joggers. Kay wa koy nakita nga bisan usa nila nga nagpahimus sa lapad nga luna nga gitukod diay alang nila.
Niangkon si Canlas nga ang desinyo dinhi maoy labing una sa Pilipinas. Gipasabot niya nga nahitabo ni kay gawas nga di silang katandog sa mga kahoy di na sab makapalap sa dan tungod sa kamahal sa road right of way acquisition. Apil sa ilang maligsan ang higanteng planta sa Petron ug mga tubo sa lana paingon sa Mactan-Cebu International Airport.
- Latest
